A Xunta destina 4,5 millóns de euros ós apoios á compra de maquinaria agrícola en réxime asociativo. O Diario Oficial de Galicia (DOG) publicou hoxe a resolución da Consellería do Medio Rural pola que se informa das entidades beneficiarias. As achegas beneficiarán a 57 cooperativas, en tanto outras 5 quedan fóra por incumprir distintos puntos das bases.
Estas axudas teñen como obxectivo principal promover a utilización e introdución de maquinaria e equipamentos de carácter agropecuario en réxime asociativo, así como racionalizar os custos de mecanización, incrementar os mecanismos de seguridade no traballo, reducir as emisións contaminantes e fomentar o aforro enerxético.
Con estas achegas prevese a modernización das explotacións beneficiarias, á vez que tamén se espera que sirvan para reducir as emisións de gases de efecto invernadoiro e de amoníaco no agro.
A convocatoria de axudas resolta hoxe enmárcase no Programa de Desenvolvemento Rural (PDR) de Galicia 2014-2020. O prazo de xustificación destas axudas é ata o 30 de setembro de 2023.