A Consellería do Medio Rural ampliou a autorización para conxelar a carne da Indicación Xeográfica Protexida (IXP) Ternera Gallega. Deste xeito, vólvese modificar de xeito temporal o prego de condicións técnicas desta IXP para que, mentres dure o estado de alarma ou medidas similares derivadas da Covid 19, a carne deste selo de calidade poida someterse a procesos de conxelación.
Cómpre lembrar que en abril de 2020 xa se aprobara unha primeira modificación temporal do prego de condicións deste selo de calidade para permitir a conxelación. Esa autorización estivo vixente ata o pasado 31 de decembro. Desta volta, a autorización para comercializar pezas conxeladas de Ternera Gallega esténdese ata o 30 de xuño de 2021.
Estas pezas conxeladas deberán cumprir os requisitos aplicables á comercialización de carne conxelada de vacún, especialmente no relativo á información ao consumidor sobre o proceso de conxelación e á data de consumo preferente, así como á excepcionalidade da súa venda baixo a protección da IXP.
A medida de conxelación adóptase principalmente polas restriccións de actividade na hostalaría e a restauración, a través das que Ternera Gallega comercializaba unha parte importante da súa produción.