O Diario Oficial de Galicia publica hoxe a Orde do 9 de decembro de 2015 pola que se establecen as bases reguladoras para a concesión de axudas aos investimentos para a elaboración e comercialización de produtos vitícolas. Estas axudas están financiadas polo Fondo Europeo Agrícola de Garantía (Feaga), e convócanse para o ano 2016.
Beneficiarios
Poderán ser beneficiarios da medida de investimentos as empresas galegas que realicen actividades de transformación ou comercialización de produtos vitivinícolas ou ben ambas as dúas actividades simultaneamente.
As axudas cobren investimentos tales como a construción, adquisición ou mellora de adegas, a compra de nova maquinaria e equipamentos, ou ata un 8 % dos gastos xerais como honorarios de arquitectos, enxeñeiros e asesores, estudos de viabilidade ou adquisición de patentes e licenzas.
Prazo de presentación das solicitudes
O prazo de presentación de solicitudes para esta convocatoria, así como de toda a documentación requirida será dun mes contado a partir do dia seguinte ao de publicación desta orde, é dicir ata o 22 de xaneiro de 2016.
Non obstante, no caso de que o investimento inclúa a construción de novas superficies cubertas ou ampliación das existentes, o solicitante terá un prazo adicional de dous meses para presentar a preceptiva licenza de obras, é dicir ata o 22 de abril.