O Pleno do Consello Regulador da Denominación de Orixe Ribeira Sacra decidiu este mércores como data oficial recomendada para o inicio de vendima o próximo día 22 de setembro. A decisión prodúcese despois de valorar os controis de maduración que os técnicos do Consello Regulador empezaron a realizar o pasado 25 de agosto en diferentes viñedos das cinco subzonas que forman a Denominación de Orixe.
O pasado 9 de setembro comezaba a vendimar a primeira adega en Ribeira Sacra. A día de hoxe catro adegas realizaron tarefas de vendima.
Para realizar as tarefas de control de calidade en adegas e viñedos da Denominación de Orixe durante esta campaña o Consello Regulador conta co reforzo de 13 técnicos (veedores); ademais do persoal fixo co que conta todo o ano, formado pola Directora Técnica e tres técnicos.
A día 12 de setembro os datos oficiais de recollida de uva por variedades son os seguintes:
Tintas:
-Mencía: 14.483 kgs
-Garnacha: 166 kgs
Brancas:
-Albariño: 473 kgs
-Dona Branca: 1.217kgs
-Godello: 1.472 kgs
-Treixadura: 500 kgs
O total de quilogramos recolleitos ata agora é de 18.311. Segundo explica o Consello Regulador “a uva está a entrar nas adegas cun estado sanitario bo”. Nesta campaña está previsto que elaborarán viño baixo o amparo da Denominación de Orixe 95 adegas.
Na páxina web do Consello Regulador www.ribeirasacra.org poden consultarse os datos oficiais de vendima actualizados diariamente.