O fracaso da regulación voluntaria da produción, suxerida por Bruxelas como vía para encarar a crise láctea, fai que aparezan sobre a mesa novas propostas. O Copa Cogeca, o organismo que agrupa a nivel europeo a cooperativas e organizacións agrarias, estuda varios camiños posibles. Unha das alternativas que baralla pasa por enviar ó matadoiro a 500.000 vacas -39.000 españolas-, medida para a que propón unha indemnización de 1.380 euros por animal.
A cabaña gandeira da UE aumentou en 100.000 cabezas entre decembro do 2014 e decembro do 2015. É un aumento pequeno, inferior ó 0,5 %, pero na actual situación, cun mercado no que a oferta supera a demanda, todo aumento penaliza.
Irlanda e Holanda lideran os aumentos de cabaña gandeira. En España permaneceu estable
A Comisión prevé ademais novas subas de produción no 2017. No segundo semestre do 2016, a produción baixará, pero o elevado número de becerras menores dun ano que había en decembro pasado no conxunto da Unión augura a chegada de máis leite ó mercado.
O aumento de animais desde o fin das cotas concentrouse sobre todo en países con clara vocación exportadora, caso de Irlanda (+10%) ou Holanda (+7%), en tanto que en España a cabaña permaneceu estable e en Francia baixou un 1%. As restriccións ás entregas impostas polas industrias en España obrigaron a paralizar os crecementos que tiñan previstos parte das explotacións e levaron tamén a un aumento do envío de vacas ó matadoiro.
Propostas
O Copa Cogeca, un organismo que agrupa a cooperativas e organizacións agrarias de toda Europa, discute estes días un documento con propostas para facer fronte á crise láctea. Unha das principais alternativas que suxire pasa polo sacrificio indemnizado de 500.000 animais en toda a Unión Europea.
Esa baixada da cabaña gandeira permitiría reducir as entregas de leite en arredor de 3 millóns de litros ó ano, cantidade suficiente para frear a crise, segundo as estimacións do Copa. Sería precisa a aportacións duns 700 millóns de euros por parte de Bruxelas para afrontar a medida. O principal inconvinte dun sacrificio masivo de animais estaría no seu impacto nos mercados de vacún de carne, que tampouco atravesan polo seu mellor momento.
[box style="0"]
Sistemas de xestión da oferta temporais
Outra das alternativas que propón o Copa consiste en implantar sistemas temporais de xestión de oferta, é dicir, o regreso temporal a un sistema de cotas lácteas. O Copa Cogeca pregúntase se sería preciso establecer un sistema de cotas nacionais ou ben un sistema de cotas individuais por explotación.
[/box]