A Plataforma en Defensa do Sector Lácteo estudará accións contra as industrias que incumpran o acordo asinado o pasado mércores no Ministerio. Desde a Plataforma advirten de que xa hai empresas que están a presionar ós gandeiros para que asinen contratos para os próximos meses que non melloran o prezo actual, o que entenden como un incumprimento do acordo asinado por distribución e industrias en Madrid.
A maiores, as organizacións agrarias que integran a Plataforma advirten de que hai un grupo de primeiros compradores –intermediarios- que non retiraron os contratos á baixa. O sector está tamén preocupado polas presións ós gandeiros que participaron nas mobilizacións. “Están a ser criminalizados por defender o seu traballo. Non permitiremos que ditas presións rematen en represalias”, sinalan os representantes dos produtores.
Comisión de seguemento
A Plataforma solicitará da Xunta a posta en marcha dunha comisión de seguemento en Galicia na que abordar os posibles incumprimentos do acordo asinado en Madrid, según informa a Organización de Productores de Leche (OPL) en nota de prensa.
Por último, a Plataforma reitera que está aberta á incorporación de todos os colectivos interesados en defender ó sector lácteo e que queiran participar na toma de decisións das medidas a seguir a partir de outubro.