A Organización de Productores de Leche (OPL) vén de desconvocar as accións de protesta que tiña previstas este mes en demanda de melloras para o sector lácteo. O colectivo entende que é máis conveniente chegar a acordos con outras organizacións do agro para impulsar convocatorias unitarias, de xeito que se unan os esforzos do sector productor e se reduzan as confrontacións internas.
Días atrás, a OPL convocara de xeito unilateral unha mobilización para este martes 24 ante a Xunta de Galicia, así como unha folga de entregas de leite a partir do 30 de marzo. As organizacións agrarias tradicionais en Galicia –Unións Agrarias, Xóvenes Agricultores e Sindicato Labrego-, que se reuniron esta semana, decidiron desmarcarse desas protestas e lanzarlle un ultimátum ás industrias para que se senten a negociar cos gandeiros e coas organizacións de produtores sobre prezos, volumes de recollida e contratos.
En Galicia, teñen capacidade para actuar como organizacións de produtores Ulega, ligada a Unións Agrarias, Aprolact, de base cooperativa; e a propia OPL, que foi recoñecida recentemente polo Ministerio como organización de produtores, según lembra a propia Organización de Productores de Leche en nota de prensa remitida hoxe.
De non haber cambios significativos nos próximos días na situación do sector, albíscanse inminentes protestas conxuntas a curto prazo. Tanto a OPL como as restantes organizacións do agro coinciden na importancia da unidade do sector e agárdanse conversas nos próximos días para chegar a posibles convocatorias conxuntas. A OPL, en nota de prensa remitida hoxe, incide na necesidade dun sector produtor forte e unido “ante os abusos de Administracións, industrias e distribución”.
Por último, a OPL tamén lamenta que as outras organizacións agrarias non apoiaran a súa convocatoria de mobilizacións, pero insiste en que para evitar divisións e enfrontamentos no sector, decidiu aprazar as súas accións á espera dunha reunión coas outras organizacións para chegar a convocatorias conxuntas.