Preto de 20.000 persoas manifestáronse este mediodía en Galicia para esixir a Xunta e Goberno Central que medien coa distribución e coa industria para que os gandeiros reciban un prezo sostible polo leite que lles cubra os custos de produción.
A manifestación máis multitudinaria foi a de Santiago de Compostela, que congregou a unhas 15.000 persoas. A marcha saíu pasadas as 12:00 horas da Alameda e percorreu as rúas de Santiago ata chegar á sede da Xunta de Galicia en San Caetano, onde se deu lectura a un manifesto. A esta hora miles de gandeiros permanecen rodeando o recinto ata coñecer os termos do acordo acadado en Madrid.
Tres vacas encabezaban a manifestación e detrás delas un grupo de gandeiros e alcaldes portaban unha pancarta co lema “Nin un paso atrás na defensa dos gandeir@s galeg@s”.
Tanto os representantes da Platafoma como Águeda Capón, unha gandeira de Chantada que leu o manifesto, advertiron que o acordo ten que garantir tres aspectos básicos: unha recuperación do prezo do leite, mecanismos legais e sancións que obriguen a industria e distribución a cumprilo e que a recuperación do prezo do leite sexa efectiva en Galicia a partir do 1 de outubro.
Pola noite, ás 22:00 horas celebrarase unha asemblea de gandeiros na Avenida de Lugo.
Mobilización en Lugo
Ao mesmo tempo que a de Santiago discorreu a manifestación de Lugo, que congregou a máis de 4.000 persoas.
[caption id="attachment_14816" align="alignleft" width="300"]
A marcha transcorreu baixo o lema “A unión fai a forza” e a ela tamén acudiron dous autobuses con gandeiros de León. Unha vez coñecidos os resultados da reunión, os gandeiros celebrarán unha asemblea ás tres da tarde para valorar o acordo.
O voceiro dos gandeiros de Lugo, Roberto López, tamén se referiu á posibilidade de ampliar as protestas á distribución e á industria láctea, pero subliñou que “son opcións que inda estamos barallando”.