Xornadas formativas na provincia de Ourense sobre aspectos prácticos da normativa forestal

Ó longo deste mes de novembro celebraranse na provincia de Ourense distintas accións formativas sobre Aspectos Prácticos da Normativa Forestal. En concreto as xornadas levaranse a cabo en nove localidades: Carballiño, Xunqueira de Espadañedo, Ourense, O Barco de Valdeorras, Castro Caldelas, Verín, A Gudiña, Bande e Xinzo de Limia.

O obxectivo destas actividades é achegar á poboación do medio rural como lle afecta a normativa vixente en materia de montes e prevención de incendios forestais, centrándose nos procedementos máis habituais que a maioría dos habitantes de aldeas e pobos van a necesitar nalgún momento.
Así, no programa inclúense, entre outros, os seguintes temas:
– Obrigas de xestión da biomasa para prevención de incendios
– Usos do lume e permisos de queima
– Actividades en terreos queimados
– Repoboacións forestais
– Aproveitamentos de madeira
– Cambios de actividade

Estas accións están aprobadas dentro do plan de Formación Continua de Medio Rural a través da Axencia Galega de Calidade Alimentaria (Agacal). As xornadas están organizadas polo Servizo provincial de Montes de Ourense en colaboración cos distritos forestais da provincia, cuxo persoal impartirá a formación.

Os cursos están dirixidos a persoas vinculadas profesionalmente cos sectores produtivos relacionados coa agricultura, gandería, industria alimentaria e cadea forestal-madeira, ou con expectativa de incorporación, en especial xuventude do medio rural. As persoas interesadas poden solicitar máis información nos teléfonos 988 386 706 e 616 480 069 e anotarse enviando un email a montes.medio-rural.ourense@xunta.gal ou maria.jose.alberte.rivera@xunta.gal