Xornada voluntaria de plantación no monte veciñal do Viso para crear franxas verdes

A comunidade de montes veciñais do Viso, ubicada en Redondela, programou dúas xornadas de plantación, abertas a voluntarios, para avanzar na recuperación da superficie queimada no 2016

Xornada voluntaria de plantación no monte veciñal do Viso para crear franxas verdes

Zona afectada por un lume do 2016 no monte do Viso. / Arquivo.

O monte veciñal do Viso, en Redondela, está a organizar dúas xornadas de plantación abertas ás persoas voluntarias que se queiran achegar. Serán este domingo 18 de febreiro, a partir das 10.30 horas da mañá no monte do Espiño, e o domingo 4 de marzo no monte da Peneda. As actuacións previstas consisten na plantación de especies frondosas (castiñeiros, carballos e outras) para restaurar a zona afectada por un lume do 2016 e para avanzar na repoboación do monte.

A plantación do domingo 18 creará franxas verdes de frondosas caducifolias en torno á pista principal que atravesa o monte e arredor de casas do barrio de Nogueira, sempre mantendo as distancias de seguridade establecidas na lexislación. O obxectivo de ambas plantacións é crear masas de frondosas autóctonas que melloren a defensa contra incendios forestais do monte comunal.

Na sesión do domingo 4 de marzo, a actuación será no alto da Peneda, no entorno do miradoiro que alí existe e aproveitando os traballos de limpeza e rareo que a comunidade de montes realizou recentemente, por un importe superior aos 8.000 euros. Neste caso, búscase aumentar a diversidade e a resiliencia contra o lume no alto da Peneda, no terzo que se atopa no Concello de Redondela, repoboando con diversas especies, favorecendo que co tempo a zona poida amosar un mosaico de especies autóctonas: sobreiras, rebolos, carballos, castiñeiros, acivros, bidueiros, espiños e érbedos.

Os traballos contan coa colaboración, igual que o pasado ano, das empresas ‘Xirela, servizos técnicos e obras do rural’ e ‘Maquinaria Agrícola Carpintero’. A actividade está aberta á veciñanza e ás persoas voluntarias que queiran achegarse. Só é preciso, na medida do posible, levar un legón e lubas. Con estas xornadas de plantación, a comunidade de montes trata de achegar á cidadanía a experiencia de participar no mantemento e coidado da natureza, explicando ademais de xeito didáctico as accións de mellora que se están a desenvolver no monte do Viso.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información