Xornada técnica en Portomarín sobre vixilancia sanitaria do gando

Un encontro en Portomarín abordará enfermidades, aplicacións informáticas e o uso responsable de medicamentos na gandaría

Campo Galego 08/11/2024 9:24 a.m.

Ir a los comentarios

Imaxe de arquivo.

O 20 de novembro terá lugar a “Vixilancia sanitaria nas ADSG de Galicia. Enfermidades e aplicación informáticas” no Pazo do Xeneral Paredes, en Portomarín (Lugo).

Organizada por CIAM-AGACAL e coa colaboración da Subdirección Xeral de Gandaría, ADSG Terra de Ulloa-Pallares e ADSG Paradela, esta acción está cofinanciada polo Feader nun 60%, polo Ministerio de Agricultura, Pesca e Alimentación nun 12% e pola Comunidade Autónoma de Galicia nun 28%.

A xornada ten como obxectivo informar sobre os traballos de investigación da liña C7 da Agacal, centrados na produción de alimentos seguros e saudables mediante a vixilancia da produción primaria e da sanidade animal.

Trataranse temas como os programas sanitarios das ADSG de gando vacún en Galicia, incluíndo plans de alerta sanitaria, enfermidades de declaración obrigatoria en España e na UE, ou as incluídas no código zoosanitario da OMSA.

Tamén se abordará o uso responsable de medicamentos veterinarios, especialmente antimicrobianos, e o uso de ferramentas web como PRESVET e a Oficina Agraria Virtual para a xestión e comunicación.