Galego
O Centro de Investigacións Agrarias de Mabegondo (CIAM), en colaboración coa Fundación Juana de Vega organizan o próximo 6 de novembro na sede do CIAM unha xornada de presetanción dos recursos fitoxenéticos autóctonos de Galicia que se conservan neste centro dependente da Axencia Galega de Calidade Alimentaria (AGACAL).
Actualmente no CIAM consérvase unha colección de millo (máis de 600 ecotipos e 695 liñas puras), máis de 1.600 mostras de sementes pratenses de 100 especies, unhas 300 accesións de cereais de inverno (trigo e centeo), cultivos hortícolas (tomate, pemento, leitugas, cebolas, etc.) e unha colección de mazás e pereiras, neste caso mantidos in vivo.
Como resultado do intenso traballo desde a década de 1970, moitas variedades de conservación ou comerciais, así como poboacións naturais, foron rexistradas ou están en proceso de ser rexistradas nos últimos anos para polas a disposición do sector.
A Fundación Juana de Vega colabora na organización desta xornada na que se mostrará o contido das coleccións e os resultados obtidos até a data con este material, tanto en termos de conservación, multiplicación e caracterización, como en termos de rexistro de variedades.
O Servizo de Sanidade e Produción Vexetal da Xunta de Galicia tamén abordará a normativa e particularidades da comercialización de variedades rexistradas, e o Centro de Formación e Experimentación Agroforestal Guísamo como experiencias afíns para a formación e transferencia de variedades tradicionais.
Tamén se presentarán os resultados obtidos no convenio entre a Fundación Juana de Vega e AGACAL para “A caracterización, recuperación e conservación da biodiversidade de plantas de interese agrario en Galicia”.
A xornada está dirixida a persoas vinculadas profesionalmente a sectores relacionados coa agricultura, a gandaría, a industria agroalimentaria e a cadea forestal-madeireira ou con expectativa de incorporación, especialmente homes e mulleres novas da Galicia rural.
Inscrición
Para inscribirse á Xornada Técnica sobre Recursos Fitoxenéticos Conservados no CIAM organizada polo Centro de Investigacións Agrarias de Mabegondo en colaboración coa Fundación Juana de Vega, é necesario descargar, cumprimentar e asinar o seguinte formulario estándar:
DESCARGAR FORMULARIO DE REXISTRO
Unha vez completado e asinado, debe enviarse por correo electrónico a info@juanadevega.org
Por limitacións de capacidade por restricións debido á Covid-19, habilitarase a posibilidade de seguir o día online vía webex, para o que se deberá indicar no correo electrónico se asistirá presencialmente ou online.
Aqueles participantes que elixisen a modalidade online recibirán un correo electrónico coa ligazón para seguir o día.
Programa
