Xornada final en Galiforest, que remata cun cento de demostracións de maquinaria

O certame, que se celebra en Sergude (Boqueixón), está a acoller exhibicións de procesadoras forestais, astilladoras de biomasa e aserradoiros portátiles, entre outras

Xornada final en Galiforest, que remata cun cento de demostracións de maquinaria

Demostración de procesadoras forestais en Galiforest.

A cuarta edición de Galiforest, que conclúe este sábado en Sergude (Boqueixón), programou durante os seus tres días un cento de demostracións de maquinaria. Nunha zona de monte habilitada ó efecto e nas propias parcelas das empresas expositoras, estanse a realizar exhibicións de procesadoras forestais e de leña, de tractores forestais, autocargadores, desbrozadoras, raxadoras de leña, aserradoiros portátiles ou astilladoras de biomasa, entre outras.

Exhibición con machadas a cargo de Stihl.

Exhibición con machadas a cargo de Stihl.

Tamén se están a facer demostracións con apeiros de preparado do solo, como destoconadoras, fresadoras ou subsoladores. O programa complétase con cuestións didácticas para o gran público, como explicacións do afiado da motoserra e do seu manexo ou exhibicións de carácter lúdico de figurismo (elaboración de esculturas en madeira con motoserra) e de probas con machada.

Trituradora de biomasa.

Trituradora de biomasa.

Proposta dunha Asociación Galega de Leñadores
O certame Galiforest contou este venres cun amplo programa de xornadas técnicas que abordaron cuestións como o Plan Forestal de Galicia, as liñas de traballo do Centro de Investigación Forestal de Lourizán ou os programas dos centros de formación profesional no sector en Galicia. No marco das xornadas técnicas presentouse tamén a plataforma de compra-venda de madeira E-monte e unha proposta para crear unha Asociación Galega de Leñadores.

Exhibición de motoserra. Apertura de cervexas coa máquina.

Exhibición de motoserra. Apertura de cervexas coa máquina.

Os promotores da Asociación Galega de Leñadores, que é aínda unha idea na súa fase inicial, pensan que o rexurdir da madeira nos últimos tempos é unha oportunidade para potenciar o sector en Galicia máis alá das vendas a nivel local. Sobre esa base, Manuel Peixoto, enxeñeiro técnico forestal, e Tito Iglesias, economista, queren elaborar un plan de viabilidade dunha agrupación que poña en valor as leñas galegas.

O seu obxectivo é crear un produto estandarizado que poida ter mercados fóra de Galicia, cunha marca propia e xerando sinerxias no sector para reducir custos e mellorar tecnoloxías.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información