Galego
A firma Viveros Mañente está a presentar estes días na feira Galiforest unha gama de eucalipto nitens de folla estreita. Fronte ao habitual eucalipto nitens de folla ancha, esta nova planta salienta por dous aspectos diferenciais. É máis resistente ó fungo ‘Mycosphaerella’ e está máis adaptada ás secas estivais e ao frío invernal, o que a fan atractiva para zonas do interior das provincias da Coruña e Lugo, segundo explica o responsable da empresa, Enrique Candía.
Mañente estivo testando o eucalipto nitens de folla estreita os últimos cinco anos e decidiuse a lanzalo este ano ao mercado tras constatar os resultados. “En eucalipto nitens, nalgunhas zonas estanse a rexistrar problemas polo fungo ‘Mycosphaerella’, que fai caer as follas xuvenís e reduce o crecemento da planta os primeiros anos. Co eucalipto nitens de folla estreita resolvemos en boa medida ese problema, polo que é interesante para áreas nas que se producen defoliacións de eucalipto pola Mycosphaerella”, destaca Candía.
Planta de eucalipto nitens de folla estreita.
Outra das vantaxes da nova planta na que incide Viveros Mañente é a súa maior resistencia ao frío invernal e ás secas estivais. “Decantámonos por unha procedencia distinta ás que se usan habitualmente no eucalipto nitens buscando precisamente este comportamento, que a planta resistira mellor que o eucalipto nitens de folla ancha en circunstancias de secas estivais e de frío invernal. É tamén un rasgo que contrastamos en ensaios os últimos cinco anos e que fan que esta planta sexa de interese para zonas do interior das provincias da Coruña e Lugo”, valora Enrique Candía.
En canto ao impacto da praga do gorgullo, Mañente sinala que na actualidade non hai ningunha variedade tolerante ó ‘Gonipterus’. “Afecta a eucalipto globulus e a eucalipto nitens de folla ancha e de folla estreita, se ben, como xa se sabe, o gorgullo ten maior preferencia polo globulus”, apunta. En zonas de alto impacto, a única solución pasa pola loita biolóxica contra a praga.
