Galego
O sindicato Unións Agrarias ven de emitir un comunicado no que lamenta o que considera “desatención da Xunta de Galicia ás propostas trasladadas pola organización agraria para modificar a norma ministerial de aplicación da nova PAC” en Galicia.
En concreto, Unións refírese á negativa da Consellería do Medio Rural a modificar o período de control da diversificación de cultivos do pago verde da PAC para permitir que as explotacións puidesen cultivar ata o 100% da superficie con millo forraxeiro, o que, en principio, redundaría nunha mellora da súa rendibilidade.
Neste sentido, o sindicato critica que “non se entende que despois dunhas longas negociacións -entre Unións e a Consellería- se tire co avanzado baixo o recorrente e falso argumento de que Bruxelas non permite as modificacións”.
Así, o sindicato instaba a que o período no que se verifica a porcentaxe de cultivos se correspondese cos cultivos de inverno, de xeito similar ao que fixo o goberno de Asturias.
O ano pasado Medio Rural ditou que o período principal de cultivo de Galicia fora unicamente o comprendido entre maio e setembro, mentres que este ano é de maio a xullo, “co que se volve limitar a produción de millo ao 75% da súa superficie de terras arables, introducindo outros cultivos con menor valor nutricional para o gando”, e provocando unha mingua na rendibilidade das explotacións lácteas.
