Unha planta ubicada en Monforte transformará restos de corta en biocarbón

A instalación, pioneira a nivel europeo, terá capacidade para procesar 80.000 toneladas de biomasa ó ano. Os promotores proxectan ter a primeira fase en funcionamento no 2017 e a instalación completa a inicios do 2019

Publicidade
Unha planta ubicada en Monforte transformará restos de corta en biocarbón

Presentación da planta esta maña en Silleda. / Imaxe: Semana Verde.

O porto seco de Monforte acollerá unha planta que transformará os restos de corta de piñeiro e de eucalipto en biocarbón. A instalación contará cun total de 18 reactores para procesar a biomasa e terá capacidade para xestionar 80.000 toneladas de materia prima ó ano. A sociedade promotora da planta, Abiga, confía en iniciar as obras en breve para ter en funcionamento 6 dos 18 reactores no 2017. O resto da instalación estaría finalizada a comezos do 2019, segundo os plans iniciais.

A planta baséase nunha tecnoloxía desenvolvida por Ingalca, socio tecnolóxico do proxecto, que no 2010 montou en Valencia unha planta piloto para a obtención de biocarbón HTC a partir da biomasa.

O proceso de obtención do biocarbón imita de xeito acelerado á formación do carbón mineral na natureza. Os restos de corta son sometidos a altas presións, de ata 20 bares, e a temperaturas de 180 graos durante un periodo de 6-8 horas. Transcurrido ese periodo, os restos de corta, polas, casca e tocóns, quedan convertidos en biocarbón.

O biocarbón orientarase tanto ó consumo en fogar como o seu uso en centrais térmicas de produción de electricidade

O produto resultante do proceso, que se comercializará en forma de pellets de biocarbón, orientarase tanto a instalacións domésticas como a industrias e mesmo a centrais térmicas de produción eléctrica, que poderían sustituir parcialmente o carbón mineral por biocarbón.

O material presenta varias vantaxes en relación ó pellet tradicional de biomasa. O seu poder calorífico é de 23-24 megaxulios por quilo, ata un 40% superior ó do pellet, e cumpre coa normativa europea de biocombustibles, un requerimento que os pellets de biomasa elaborados con restos de corta normalmente non poden cumprir, polo que o habitual é que se fabriquen con puntal de piñeiro.

Biofertilizante
Outra cuestión a ter en conta é que o proceso nútrese de materia orgánica húmida, con independencia do seu grao de humidade. Durante a transformación da biomasa en biocarbón, esa materia deshidrátase e da auga resultante, rica en nitratos, potasio e outros minerais, obtense un concentrado que se tratará de comercializar como biofertilizante.

O proceso permitirá a obtención dun biofertilizante líquido que se tratará de comercializar para agricultura ecolóxica

Ingalca leva anos facendo probas do biofertilizante en colaboración co Instituto Valenciano de Investigación Agraria (Ivia) e conta con obter as homologacións pertinentes para o seu uso en agricultura ecolóxica.

Para nutrirse de materia prima, Abiga ten preacordos con empresas do sector forestal, se ben polo de agora non revela os seus nomes. En canto á comercialización do biocarbón, farase tanto a nivel nacional como internacional, tarefa para a que xa hai acordos estratéxicos con importantes compañías internacionais. Cando a planta estea a pleno rendemento, obterá 37.000 toneladas de biocarbón ó ano.

Presentación
O proxecto presentouse esta mañá na I Feira da Enerxía de Galicia, que se celebra no recinto feiral da Semana Verde, en Silleda. O acto contou coa participación, entre outros de Manuel Varela, de Abiga, sociedade promotora da planta; de María Luisa Hernández, de Ingalca, empresa socia tecnolóxica do proxecto, e do director xeral de Enerxía e Minas da Xunta, Ángel Bernardo Tahoces, que sinalou que a planta de biocarbón é un proxecto “innovador, de futuro e cuasi revolucionario”.

A planta estará ubicada no porto seco de Monforte nunha parcela de 40.000 metros cadrados e dará emprego directo a 20-25 persoas para a operación da instalación, sen contar co persoal que participe na recollida dos restos de corta no monte.

I Feira da Enerxía en Silleda

O recinto feiral da Semana Verde acolle ata mañá sábado a I Feira da Enerxía de Galicia. O evento, que terá carácter bianual, congrega nun dos pabellóns da Feira a expositores de enerxías renovables e convencionais, que abordan ámbitos como a eficiencia enerxética, o autoabastecemento, a electrónica industrial ou a iluminación.

Trátase dunha feira dirixida tanto para o ámbito industrial como para o fogar. Entre os produtos e servizos que se ofertan, figuran caldeiras de biomasa, pellets, sistemas de iluminación, equipos de xeotermia ou placas solares.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información