A prestixiosa revista norteamericana Wine & Spirits Magazine seleccionou entre o seu top 100 anual á Adega Quinta da Muradella de Verín entre as 100 mellores adegas do mundo .
Esta exclusiva lista só a integran en España cinco Bodegas Veiga – Sicilia, Gran Clos del Priorat, López de Heredia de La Rioja e Bodegas y Viñedos do enólogo Raúl Pérez.
Quinta da Muradella é unha pequena adega da Denominaión de Orixe Monterrei que desde os seus inicios apostou pola exclusividade, recuperando variedades autóctonas como Albarello, Bastardo, Dona Branca ou Monstruosa de Monterrei, e por unha viticultura tradicional respectuosa co medioambiente.
José Luís Mateo García, viticultor e propietario da adega, cultiva xunto con outros dous traballadores, un total de 19 hectáreas de viñedo que nun ano normal permiten elaborar unhas 40.000 botellas, boa parte con destino á exportación.
“É a segunda vez que recibimos este recoñecemento de Wine & Spirits Magazine, a primeira foi en 2014, e para min é moi importante porque sitúa á Denominación de Orixe Monterrei no mercado de Estados Unidos. Ademais, é un orgullo para min, para a familia e para os meus traballadores que Quinta da Muradella figue na mesma lista que outras grandes adegas de renome a nivel nacional”, asegura José Luís Mateo.
A adega apostou desde os seus inicios pola agricultura ecolóxica, e nestes momentos xa ten 15 hectáreas certificadas polo CRAEGA. En canto á conxuntura actual, este viticultor recoñece que “está todo moi complicado, porque os mercados exteriores tamén están moi afectados pola crise do Covid 19 e no noso caso estamos moi centrados na canle HORECA”. “Temos que aguantar como sexa porque algún día isto terá que recuperarse”, subliña.