Últimos días para solicitar as axudas da Xunta para promocionar o viño galego fóra da Unión Europea

Publicidade

A Xunta lembra que o vindeiro venres 14 de xaneiro remata o prazo para solicitar as axudas de 2022 que teñen por obxecto apoiar a promoción do viño galego en mercados de terceiros países, isto é, fóra da Unión Europea. Estas subvencións xestionadas pola Consellería do Medio Rural contan cun importe de 2,1 millóns de euros, dos que 1,1 millóns están asignados a este ano e o millón restante ao 2023.

Poderán acollerse ás achegas as empresas vinícolas, as organizacións de produtores e as súas asociacións, así como os órganos de xestión e de representación das denominacións de orixe protexidas e das indicacións xeográficas protexidas de viño e as cooperativas que comercializan viños elaborados por elas ou polos seus asociados.

Tamén se poderán beneficiar destas axudas as entidades asociativas sen ánimo de lucro participadas exclusivamente por empresas do sector vitivinícola que teñan entre os seus fins a promoción exterior dos viños, as organizacións profesionais e interprofesionais do sector e as asociacións temporais ou permanentes de produtores que teñan entre os seus fins o desenvolvemento de iniciativas en materia de promoción e comercialización do viño.

Ao abeiro destas achegas, as accións e actividades de promoción que se poden desenvolver son todas aquelas nas que se dean a coñecer as características dos viños con denominación de orixe ou indicación xeográfica protexida, así como os viños varietais. Entre as accións promocionais destacan campañas publicitarias, misións comerciais, promocións en puntos de venda, catas, feiras, presentacións de produto, xornadas, seminarios, degustacións, etc.

A presentación de solicitudes deberá facerse de xeito telemático, a través do formulario normalizado dispoñible na sede electrónica da Xunta, https://sede.xunta.gal. As achegas para estas subvencións que xestiona a Xunta están financiadas ao 100% polo Fondo Europeo Agrícola de Garantía (Feaga).

Enlace á resolución no DOG

 

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información