Ucoga abre unha nova oficina en Monforte de Lemos

Ucoga vén de inaugurar unha nova oficina en Monforte de Lemos dentro do seu plan de crecemento en Galicia. A apertura responde ao seu compromiso de estar máis preto do cliente, ofrecendo un servizo profesional, humano e adaptado ás necesidades reais de cada persoa.

Esta nova sede nace da colaboración entre Ucoga e a Cooperativa Lemos, coa que mantén unha alianza consolidada. A correduría é xestora exclusiva de seguros para a cooperativa, e ambas entidades comparten o obxectivo de ofrecer solucións aseguradoras de calidade ao sector primario.

Con esta oficina, Ucoga quere achegar o seu modelo de atención a toda a poboación da zona. Refórzase así o compromiso da empresa co medio rural e co desenvolvemento local.

Desde a sede de Monforte ofrecerase o catálogo completo de produtos aseguradores: agrarios, de fogar, saúde, vida, automóbil e empresas, entre outros. A correduría traballa con máis de 35 compañías, o que lle permite deseñar propostas a medida e con condicións competitivas.

Iván Novo, director xeral de Ucoga, afirmou que “esta apertura reforza o noso compromiso co rural galego e co sector agrario, que é a orixe e motor da nosa actividade”.

O acto de inauguración contou con representantes de Ucoga, da Cooperativa Lemos e numerosos veciños da localidade, que se achegaron a coñecer o novo espazo e ao equipo profesional que prestará o servizo.