Galego
Faixa de protección executada no Concello de Ribadeo, un dos que se acolleu ao programa ‘O Que Non Arde’
Un total de 13 Concellos de toda a provincia de Lugo (A Pobra do Brollón, Becerreá, Folgoso do Courel, Guitiriz, Láncara, Lourenzá, Mondoñedo, Navia de Suarna, O Saviñao, Pedrafita do Cebreiro, Quiroga, Ribadeo e Viveiro) responderon á primeira convocatoria do plan de axudas ao mantemento de faixas de biomasa impulsado pola área de Medio Rural da Deputación Provincial de Lugo.
Os concellos terán que achegar agora a documentación para acreditaren o cumprimento da normativa de prevención de incendios forestais, requisito necesario para acceder á liña de axudas, dirixidas a financiar a roza das masas forestais nos laterais das redes viarias municipais (eixo 1 da convocatoria) e á repoboación posterior das faixas de xestión de biomasa con árbores autóctonas (eixo 2).
A casuística detrás dos lumes forestais é complexa, pero resulta evidente que o camiño para atallar esta problemática pasa pola prevención, pola ordenación do territorio e o aproveitamento multifuncional do monte
Os proxectos presentados serán estudados por unha comisión técnica, que avaliará tanto a súa calidade técnica como outros criterios cuantitativos, como o control dos incumprimentos da normativa en materia das obrigas de xestión da biomasa vexetal, ou as accións de execución subsidiaria e procedementos sancionadores realizados dende o propio Concello.
Baixo o título de O Que Non Arde, que fai referencia á premiada película de Óliver Laxe rodada nos Ancares, o programa provincial para a roza de estradas municipais implementarase a través de convenios interadministrativos de colaboración entre a área de Medio Rural e os Concellos beneficiarios que cumpran os requisitos contemplados nas bases.
A Xunta de Galicia descargou nos Concellos a responsabilidade de previr os incendios nas faixas de protección sen achegarlles ningún medio ou recurso para afrontala
A deputada de Medio Rural, do Mar e Mocidade da Deputación de Lugo, Mónica Freire Rancaño, amosouse satisfeita coa resposta a esta primeira convocatoria do plan, que “naceu para incentivar e apoiar políticas orientadas á prevención de incendios”. “A casuística detrás dos lumes forestais é complexa, pero resulta evidente que o camiño para atallar esta problemática pasa pola prevención, pola ordenación do territorio e o aproveitamento multifuncional do monte”, expuxo.
A deputada nacionalista tamén incidiu nas dificultades que afrontan os concellos á hora de apostar por estas políticas ante o “abandono da Xunta de Galicia, que descargou nos Concellos a responsabilidade de previr os incendios nas faixas de protección sen achegarlles ningún medio ou recurso para afrontala, polo que teñen que executar subsidiariamente as rozas cos seus escasos medios cos que contan”, concluíu.
