Galego
O mes de maio é un mes de máis luz e calor que, combinadas coa humidade das últimas choivas, fará que os nosos cultivos medren con forza. Tamén medrarán abundantemente as herbas polo que as sachas e aporcados ou aconchegados serán frecuentes.
Labores máis frecuentes:
-É o momento de transplantar no exterior os grandes cultivos no verán: tomateiras, pementos, berenxenas, leitugas, acelgas…., tanto se o facemos con cepellón ou a raíz núa. As noites frías destes días aconsellan aprazar a plantación ata a semana que ven e mesmo para mediados de mes, sobre todo para tomates, pementos e berenxenas, en caso de que as plantemos no exterior. Se o facemos nun invernadoiro, non teremos este problema e poderemos plantar dende xa.
-Tamén estamos no mes idóneo para plantar directamente de semente tanto cenouras como xudías e todo tipo de cucurbitáceas: cabaciña, cogombro, cabaza, melóns, sandías…etc. O frío e o exceso de humidade poden facer podrecer as sementes, polo que se aconsella agardar uns días a que as temperaturas nocturnas suban un pouco.
-Poderemos seguir plantando cebola e porros.
-Maio é tamén o mes máis axeitado Galicia para a sementeira do millo. A plantación de millo doce para autoconsumo é unha alternativa interesante, máxime cando se trata dun cultivo que se da moi ben no noso país e non precisa de poucos coidados.
-Á hora de plantar non debemos esquecer que o abono debe estar maduro -non é recomendable aplicar esterco fresco- e nunca debe estar en contacto directo coa raíz.
-É o momento de realizar os semilleiros para os cultivos que queiramos transplantar no verán, como repolos, leitugas ou remolacha de mesa. Regarémolos cando sexa preciso xa que son moi sensibles á deshidratación nos días de calor.
-Polo demais, empezaremos a colleitar os cultivos de primavera: chícharos, fabas lobas, cebolas tenras e patacas novas.
-A calor e a humidade farán que empecen a proliferar fungos como o mildeu, sobre todo cando suban as temperaturas nocturnas. Para combatelo é recomendable facer tratamentos con caldo bordelés –cobre- cada dez días. Patacas e vide son os cultivos máis sensibles a este fungo, e polo tanto debemos estar vixiantes e facer os tratamentos periódicos para frealo.
-Outro fungo, o oídio, tamén se propagará coas condicións favorables que vai ter (humidade e calor). Un tratamento a base de xofre é o máis recomendable para combatelo, sobre todo en cultivos como o allo ou a cebola.
