Galego
Un dos postos da feira, onde se dan cita os produtores locais para vender os butelos e outros derivados do porco
Achégase a Feira do Butelo da Fonsagrada, que se celebra sempre na fin de semana anterior ao Entroido. Este ano será a fin de semana do 22 e 23 de febreiro cumplindo á súa edición número 28. Trátase dunha das citas gastronómicas máis asentadas do calendario invernal e está clasificada como Festa de Interese Turístico de Galicia.
O sábado e o domingo na carpa ubicada na praza principal da localidade pódense mercar todo tipo de produtos gastronómicos, especialmente os derivados do porco, coma é o butelo, un embutido típico da zona feito de costelas e outras partes do porco adobadas e metidas no estómago do cocho e logo curado e afumado con leña de carballo.
A Feira do Butelo abre o calendario de citas gastronómicas do inverno na comarca e está declarada Festa de Interese Turístico Galego
No transcurso da Feira será entregado o Butelo de Ouro, un galardón que distingue cada ano a persoas relevantes para o municipio. Nesta ocasión, recoñecerase a labor de Álvaro Touza, primeiro director do instituto da Fonsagrada, e Antonio López, primeiro alcalde democrático do Concello e un dos artífices de que se abrira o centro educativo de ensinanza secundaria na localidade, que evitaba ao alumnado ter que ir estudar a Lugo. Ambos recibirán o galardón o domingo á unha da tarde.
Programa
O resto do programa mantén en esencia a mesma organización ca todos os anos. “É un programa sen moitas variacións, é algo que funciona, polo que non hai moito que reformullarlle. É un modelo que ten éxito”, destaca Carlos López, o alcalde da Fonsagrada, que se enche de visitantes na fin de semana da Feira do Butelo.
A feira dará comezo o sábado 22 de febreiro ás 10:00 horas coa apertura da carpa, que permanecerá aberta ata ás 20:00 horas. Ás 12:30 horas terá lugar a inauguración oficial da Feira e, a continuación, ás 13:00 horas dará comezo o paseo polos diferentes postos. O domingo a apertura da carpa será tamén ás 10:00 e o peche ás 20:00. Os dous días haberá animación musical.
O pleno da corporación municipal decidiu por unanimidade conceder o Butelo de Ouro a Álvaro Touza e a Antonio López
Coma é tradición nos últimos anos, o cartel desta edición da Feira do Butelo da Fonsagrada volve homenaxear ao humorista Forges, natural deste municipio da montaña de Lugo e que chegou a apadriñar a celebración antes do seu falecemento. Forges contará a partir deste ano co seu propio museo na Fonsagrada, que está previsto que se inaugure o vindeiro mes de xullo.
Poranse á venda 15.000 quilos de butelo e outros produtos elaborados por empresas locais
Na edición deste ano poranse á venda uns 15.000 quilos de produto, entre butelos e outros derivados do porco, que son elaborados polas industrias locais que contarán con postos na feira, entre elas Casa Castelao e Embutidos Buenavista, así como Facenda Farruquiño, asentada tamén na localidade.
“Son empresas que xeran emprego, polo que desde o Concello estamos pola labor de potenciar o produto”, avanza o alcalde da Fonsagrada. Desde a súa orixe a Feira do Butelo consolidouse como un referente no calendario gastronómico galego e unha cita ineludible como prólogo ao Entroido, podendo os visitantes aproveitar para adquirir produtos da matanza típicos destas datas, como chourizos, lacóns, touciño, cachucha, soá ou o propio butelo.
Dinamización económica
A celebración da Feira do Butelo serve tamén para dinamizar o comercio e a hostalaría local, tanto bares e restaurantes como casas de turismo rural e outro tipo de aloxamentos, que rozarán o cheo durante toda a fin de semana.
Os restaurantes da Fonsagrada acompañan a celebración ofrecendo durante toda a fin de semana menús nos que o butelo é o protagonista
“A Fonsagrada énchese complemetamente durante toda esa fin de semana. Somos un municipio que ten bos servizos de hostalaría e estanse a poñer en marcha novas iniciativas de turismo rural en lugares como Barbeitos ou o Piñeiral”, destaca o rexedor.
Control OJD
