A suba da enerxía trasládase ao monte: o eucalipto nitens baixa un euro e o puntal de piñeiro dous

O 2026 está a ser polo de agora un ano de cautela para o sector forestal galego, que acusa os efectos colaterais da guerra en Irán, co incremento de custos de produción nas fábricas polo encarecemento da enerxía e o impacto da suba do gasóleo na saca e o transporte, o que está repercutindo en prezos á baixa para os propietarios forestais, sobre todo na madeira de peor calidade e peores condicións de aproveitamento, tanto no caso do piñeiro coma no eucalipto. “Está padecendo máis o nitens que o glóbulos e no piñeiro o puntal máis que a rolla”, aseguran fontes do sector.

A principios de ano semellaba que o mercado comezaba a animarse e esperábase un certo repunte de prezos na primavera para o eucalipto pola remontada da cotización da pasta de papel, pero esa esperanza converteuse nun espellismo, xa que os prezos no monte non só non subiron, senón que baixaron lixeiramente.

Trala perda de dous euros sufrida en 2025 e un comezo de 2026 plano, os prezos do eucalipto veñen de sufrir unha nova corrección á baixa este mes de maio, que afecta polo de agora unicamente ao eucalipto nitens, o máis cortado xa nos montes galegos.

A madeira de peor calidade e menos valor (eucalipto nitens e piñeiro para trituración e palés) é a que máis está a acusar o incremento de custos das fábricas

No piñeiro, ao igual que acontece no eucalipto, a madeira de maior calidade está a manter os prezos, en tanto as pezas de menor diámetro están a sufrir os efectos da suba de custos, con descensos de 2 euros en tonelada  no puntal para trituración, destinado á industria do taboleiro, e de ata 3 euros na rolla máis delgada, a destinada á fabricación de palés.

Baixada no nítens e mantemento no glóbulus

As empresas forestais están a trasladar nas novas compras a baixada anunciada por Ence Navia aos seus provedores no mes de abril. A pasteira alega que os custes de produción aumentaron nas fábricas pola suba da enerxía, mentres no monte as empresas forestais acusan a suba do gasóleo nos traballos de corta, saca e transporte.

O prezo do eucalipto glóbulus nos parques de madeira de Ence mantense sen cambios desde principios de ano, mentres que e o nitens caeu un euro

Así, trala baixada dun euro, o nitens estase a pagar neste momento no norte de Galicia (A Mariña e Ferrolterra) a 29-30 euros a tonelada (prezo final a cobrar polo propietario, co 12% de IVE incluído e descontada xa a retención do 2% de IRPF) para madeira certificada en pé sen pelar (5-6 euros máis o pelado).

Indo cara o interior de Lugo e A Coruña (comarcas da Terra Chá, A Ulloa ou Arzúa), onde as cortas de nitens gañan protagonismo ano tras ano, o prezo é lixeiramente superior debido a que se trata de parcelas de maior tamaño e menores dificultades orográficas, o que facilita o rendemento das máquinas no monte.

Os custes de aproveitamento en comarcas como A Terra Chá sitúanse uns 4 euros por baixo dos da Mariña ou Ferrolterra

Co mercado do nitens estancado, o interese polo glóbulus aumenta, mais non se prevé unha suba explosiva nos vindeiros meses. Isto tradúcese en continuidade de prezos, maior selección nas compras e interese crecente por madeira madura, sá, certificada, en lotes grandes e de aproveitamento doado.

No caso das comarcas costeiras do norte de Galicia, o glóbulus estase a pagar a 34-35 euros sen pelar e a 39-40 sen casca. No sur da comunidade, a zona de influenza de Ence Pontevedra, os prezos están lixeiramente por baixo, con referencia nos 27-32 euros máis IVE para o glóbulos sen pelar, dependendo basicamente do tamaño do lote, que é o que condiciona en boa medida o prezo do eucalipto nesta zona. O diferencial de prezo a favor do glóbulos con respecto ao nitens é de 5-6 euros. O mesmo acontece no caso de ir pelado.

Mellor posición para lotes grandes e madeira certificada

O mercado forestal galego do eucalipto mantense estable e expectante neste comezo de ano, con mellor posición para o glóbulus fronte ao nitens cando presenta bo diámetro, sanidade correcta e unha corta tecnicamente sinxela.

O tamaño do lote, os accesos ao monte, a dificultade da saca e a distancia ao cargadeiro, seguen condicionando en boa medida o prezo final, estando as empresas forestais dispostas a pagar cada vez máis en función da cantidade de madeira a cortar e a facilidade do aproveitamento.

O tamaño do lote, os accesos ao monte e a facilidade de acopio condicionan cada vez máis o prezo final

“Chegar neste momento a prezos de 35 euros no glóbulus e 30 no nitens só é posible para volumes grandes, de máis de 500 toneladas (uns 20 tráilers) en montes accesibles nos que non haxa que abrir pistas. Cada vez prima máis a cantidade. A partir de volumes de 1.500-2.000 toneladas podes negociar doutro xeito”, aseguran desde unha asociación de propietarios forestais.

A industria valora cada vez máis a madeira trazable, certificada e procedente de montes ben xestionados

Pola súa banda, a industria segue priorizando a madeira de calidade, ben localizada e con trazabilidade clara. Ence, por exemplo, segue a primar nas entradas ás súas fábricas os lotes de glóbulus de maior diámetro pelado. A certificación forestal continúa sendo tamén un factor relevante no prezo, con primas de 1–3 €/tonelada para madeira de eucalipto de pasta con certificación FSC® ou PEFC™.

Competencia limitada no monte

Sobre o terreo, a competencia das empresas forestais no monte é limitada neste momento. “Desde que veu o bo tempo activáronse algo as compras, porque co mal tempo a xente non sae ensinar os montes, pero non hai moita présa por comprar, porque non hai moita demanda”, din as empresas de corta e saca.

A prudencia da demanda nas fábricas tradúcese en prudencia nas compras nos montes

Despois dun inverno chuvioso, no que se notou certa baixada da produción, a chegada dos meses da primavera e o verán sempre incrementa a oferta nos parques de madeira das plantas de celulosa.

“Coas máquinas actuais, a corta e saca no inverno non baixa tanto coma antes, pero algo sempre baixa. Todos tratamos de optimizar as operacións traballando no inverno en fincas de mellor saca”, asegura un rematante que opera na Mariña, onde, tralos incendios do outono pasado, para a saca da madeira de eucalipto queimada dos montes, a maioría das empresas forestais prefiren traballar con prezos a vulto, sen dar prezos por tonelada aos propietarios.

O porto de Burela, moi parado

Os cargadeiros situados nos portos de Ferrol e Burela son os principais puntos de acopio da madeira de eucalipto galega con destino á exportación. En Ferrol aprovisiónase Navigator e na Mariña Iberpapel e algunhas fábricas europeas.

Pero neste momento “móvese pouco para Hernani ou Bélxica”, aseguran fontes do sector. “Comparativamente, poñer en fábrica madeira de lonxe sae caro e cando o prezo de venda da pasta non permiten certo marxe, estas compras redúcense”, xustifican.