Galego
As mesas de porcino da Central Agropecuaria de Galicia –Abanca acordaron este martes, na última sesión do ano, manter sen cambios os prezos do porco cebado e dos leitóns. Tampouco houbo variacións no mercado do ovo. A actividade na Central viuse esta semana reducida ó mínimo, logo de que se suspendesen as poxas de gando vacún por mor das celebracións de Nadal. O vindeiro martes, día 5 de xaneiro, recuperarase a asistencia de gando vacún.
Facemos un repaso polos prezos establecidos nas mesas de porcino. Nos porcos cebados, os animais selectos cotízanse a 1,125 euros o quilo, mentres que o normal está a 1,1 euros o quilo. Nos exemplares de Canal II o prezo sitúase en 1,429 euros e os de desvelle están entre os 0,44 e os 0,5 euros euros o quilo.
Nos leitóns, os animais procedentes dunha única gandería están a 49 euros, cun prezo de 2,45 euros por quilo. Os bacoriños chegados de distintas granxas cotízanse a 2,2 euros o quilo e o animal de 20 quilos ten un valor de 44 euros.
Tampouco houbo cambios no mercado do ovo esta semana. Os ovos da clase XL cotízanse a 1,50 euros a ducia, os da L están a 1,10 euros, os da M sitúanse en 0,96 euros e os da clase S quedan nos 0,78 euros. As galiñas de desvelle semipesadas, de entre os 2,1 e 2,2 quilos, atópanse entre os 0,08 e os 0,15 euros por quilo.
O prezo do coello na Lonxa de Madrid mantívose esta semana en 1,80 euros o quilo.
