Galego
Os tímidos movementos que se iniciaron no sector industrial para mellorar os prezos do leite teñen un dos seus principais expoñentes en Reny Picot. A firma asturiana confirma que desde o 1 de outubro está a aplicar subas xeralizadas de entre 2 e 3 céntimos para todas as súas granxas proveedoras.
Os novos contratos de Reny Picot aplican unha fórmula 80-20. O 80% do leite págase a un prezo A, de mercado, e o 20% restante a un prezo B, referenciado á evolución das cotizacións do leite en po e da manteiga no Observatorio Lácteo Europeo. En cifras, o prezo A sitúase nos 27 céntimos máis primas e o prezo B móvese actualmente tamén en torno ós 27 céntimos.
“O prezo A, tendo en conta as primas, pode chegar ata os 30 céntimos nalgúns casos; en tanto o prezo B previsiblemente subirá se continúan mellorando as cotizacións do leite en po e da manteiga”, resumen fontes da dirección da empresa.
Durante o último ano, Reny Picot estivera a ofrecer contratos coa fórmula 60-40%, cun 60% do leite a un prezo A e o outro 40% referenciado ós produtos lácteos industriais. A nova fórmula amplía a parte pagada a un prezo A ata o 80%, en tanto o prezo B benefíciase da mellora das cotizacións da manteiga e do leite en po nos últimos meses.
Leite en po
A industria caracterizouse tamén esta primavera pola compra en Galicia de cisternas spot a prezos de intervención do leite en po, no entorno dos 20 céntimos. Reny asegura que todo ese leite foi parar a leite en po.
“Enviamos máis de 2.500 toneladas de leite en po para intervención e aínda temos moita produción almacenada do último ano” -explican fontes da compañía-. “Non é certo que ese leite fose a parar a briks de leite líquido, como se ten dito” -aseguran.- “Simplemente buscamos unha saída para moito leite que estaba quedando sen recoller e que ningunha industria quería. Gustaríanos que o prezo de intervención fose máis alto, e así o pedimos públicamente, pero é o que é”, conclúen.
