Recomendan volver tratar a viña contra o mildio e empezar contra o oídio e o black rot

“Esta semana volvéronse dar condicións favorables ao mildio boa parte dos días (….) polo que non é de estrañar que o volume de esporas de mildio recollidas no captador situado na contorna das plantas testemuña da nosa viña de Areeiro sufrira un incremento destacable, de valores por debaixo de 20 esporanxios/m3 de aire a superar os 100/m3 e mesmo a chegar a 200”, sinalan.

Ante esta situación e as previsións para esta semana a recomendación dos técnicos da Estación Fitopatolóxica de Areeiro é renovar os tratamentos contra o mildio naqueles predios nos que se vexan síntomas do fungo e/ou se está próximo a finalizar o prazo de protección teórico do tratamento anterior, considerando que xa só as precipitacións do sábado día 6 reduciron o mencionado prazo.

Evitar os tratamentos con vento

Polo demáis, lembran que estanse a producir ventos de certa intensidade, de máis de 20 Km/h. “Estes ventos -advirten- fan que se movan constantemente as follas e tamén os gromos, xa son incompatibles cuns tratamentos realizados con boas prácticas de cultivo e loxicamente arrastran o caldo fitosanitario fóra das viñas, coas lóxicas implicacións de contaminación desas outras
áreas e falta de eficacia das aplicacións”.

Neste sentido, a recomendación é que se se está a aplicar un tratamento e se dan estas condicións debe deterse e continuar cando volva haber ventos de como máximo 11 Km/h, cando só se moven as follas

“E, aínda que para estes próximos días non se prevén precipitacións, lembren que é importante manter ben rozada a cuberta vexetal do viñedo”, engaden.

Oídio:

Acio_esporulacion_de oidio incipiente_planta_tratadaFoto: Estación Fitopatolóxica de Areeiro

Nas parcelas que revisaron os técnicos de Areeiro aínda non atoparon os primeiros síntomas desta enfermidade. Con todo, avisan de que “nalgunhas plantas, as máis adiantadas, xa empeza a haber timidamente algúns acios empezando a floración, e este estado é conveniente protexelo. Por iso, aconsellan engadir un antioídio cando se renove a intervención antimildiu.

Black rot:

Esta semana quizais foi esta enfermidade a que máis se incrementou a nivel xeral, pois apareceron síntomas en todas as zonas, timidamente nas plantas tratadas e de xeito máis evidente nas plantas abandonadas dos muros, que como moito reciben deriva das zonas tratadas, onde apareceron non só no limbo foliar senón tamén nalgúns pecíolos.

Debido a que non hai produtos específicos fronte ao fungo responsable desta enfermidade do Black Rot, aconsellan escoller un antimildio con efecto fronte a este outro patóxeno.