A sección ‘Noticias de empresa’ inclúe informacións de actualidade empresarial, así como as notas de prensa de firmas colaboradoras.

Recomendacións para evitar accidentes coa fendedora da leña

Publicidade
Recomendacións para evitar accidentes coa fendedora da leña

Foto: TMC Cancela

O mes de agosto sole aproveitarse no rural galego para picar e secar a leña para o inverno. Nas últimas décadas extendeuse o uso de aparellos mecánicos para facilitar o traballo, como a fendedora acoplada ao tractor para o corte e o rachado dos toros. Supuxo un importante aforro de traballo pero o seu uso tamén implica riscos de accidente.

Neste sentido, a Consellería de Emprego e Igualdade da Xunta de Galicia, a través do Instituto Galego de Seguridade e Saúde Laboral (ISSGA), ten a disposición do sector unha guía cunhas recomendacións clave para corte e rachado da leña con fendedora en condicións de seguridade. Son estas:

Operacións previas:

-Planificar o traballo.
-Realizar o mantemento das máquinas seguindo as instrucións do fabricante.
-Verificar o funcionamento dos equipos e dos elementos de seguridade.

Enganche e desenganche do apeiro:

-Estabilizar o apeiro.
-Unha vez centrado o apeiro e o tractor, desengranar a marcha e a toma de forza.
-De haber un axudante, non se interpoñerá entre o tractor e a máquina durante a manobra de enganche ou desenganche e manterase a un lado ata que o tractor estea inmobilizado.
-Colocar os bulóns e os pasadores de seguridade, de xeito que o apeiro quede axustado lonxitudinal e transversalmente e os brazos inferiores do tractor estabilizados.
-Colocar a xunta cardán coa toma de forza do tractor desconectada, comprobar o axuste de todos os pasadores e amarrar as cadeas antirrotación do tubo de protección.
-Conectar todas as conexións hidráulicas e eléctricas.

Desprazamentos:

-Comprobar que a carga do eixe dianteiro do tractor nunca sexa inferior ao 20% do seu peso.

-Colocar, antes de acceder á vía pública, a máquina en posición de transporte e situar a rampla elevadora de troncos (se se dispón) nunha posición máis elevada.

-Circular á velocidade axeitada e respectando as normas de circulación.

Corte e rachado de troncos:

-Posicionar o tractor en superficie horizontal e co freo de estacionamento.
-Posicionar a fendedora sobre unha superficie horizontal, de xeito que quede apoiada nos tres pés sen que exista risco de envorcadura.
-O operador debe colocarse nunha zona lisa e sen obstáculos.
-Non manipular a máquina dúas persoas ao mesmo tempo.
-Manter a distancia de seguridade con outras persoas.
-Manter a distancia de seguridade co raio de acción da rampla cargadora para a elevación de troncos (se se dispón dela).
-Unha vez colocado o tronco na posición correcta, hai que retirarse da área de proxección do cilindro e colocarse en liña co mando de accionamento. Accionar o mando coas dúas mans e non manipular o tronco ata que chegue o cilindro ao final da carreira.
-Traballar co diámetro de tronco indicado polo fabricante.
-Non superar en ningún caso as revolucións de traballo da máquina indicadas polo fabricante.

Inspección da máquina durante o proceso de corte e rachado (se fose necesario):

-Poñer o motor ao ralentí.
-Desembragar a árbore da toma de alimentación da máquina.
-Bloquear o tripuntal na posición requirida.
-Apagar o tractor.
-Asegurar que non existe ningún elemento nin persoa que poida modificar as condicións anteriores (manipulación do tractor, mandos, freos, arranque etc.)

Remate:

-Desenganchar o apeiro nunha zona chá e libre de obstáculos, proceder de igual maneira que para o enganche, pero en orde inversa.
-Facer as reparacións de mantemento, limpar e comprobar os elementos de
corte.

Descarga aquí a guía completa do Instituto Galego de Seguridade e Saúde Laboral (ISSGA) sobre corte e rachado da leña con fendedora.

 

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información