Galego
O Centro de Investigacións Agrarias de Mabegondo acaba de publicar a actualización para o ano 2021 dos ensaios sobre o valor agronómico das variedades comerciais de millo forraxeiro en Galicia.
Dentro dunhas semanas xa se empezará a preparar a sementeira do millo forraxeiro en Galicia, un cultivo de gran importancia para o mantemento da nosa cabana de gando vacún.
Proba da importancia deste cultivo é que Galicia concentra o 60% da superficie do Estado dedicada a este cultivo e o 55% da produción. Trátase da principal produción forraxeira das preto de 7000 explotacións lácteas existentes na comunidade, así como en cada vez máis gandarías de vacún de carne, e cobra máis importancia nun momento de altos prezos do penso.
Neste sentido, o Centro de Investigacións Agrarias de Mabegondo (CIAM) acaba de publicar a actualización correspondente ao ano 2021 do Valor Agronómico das Variedades Comerciais de Millo Forraxeiro en Galicia, unha análise comparativa anual que realiza co obxectivo de avaliar o rendemento e calidade das variedades comerciais máis utilizadas no país.
Os ensaios fixéronse en catro comarcas: Sarria, Trasdeza, Ordes e A Mariña lucense. Nos ensaios utilízase un deseño en bloques aleatorios con tres repeticións, cunha densidade de 90.000 plantas/ha. Recolleuse cada variedade no momento en que a liña de leite estaba a 1/3-1/2 do ápice (gran pastoso-vítreo) e analizouse a parte verde da planta e as espigas por separado.
Variedades con dous ou máis anos de avaliación:
Variedades cun ano de avaliación:
Recomendacións para elixir unha variedade
Á hora de elixir unha variedade, desde o CIAM recomendan que o primeiro que temos que ter en conta é o ciclo que resulte máis adecuado ao clima da zona. Neste sentido aconsellan que:
-Se sabemos a data de sementeira e sumamos os días que aparecen na columna Días S-C, teremos a data probable de recollida para unha zona fría do interior.
-Se é unha zona cálida haberá que restarlle 15 días.
-Tamén é importante a dispoñibilidade de maquinaria para esa data.
Dentro do ciclo elixido, desde o CIAM recomendan escoller aquelas variedades que reúnan as dúas condicións seguintes ao mesmo tempo:
1) Un elevado índice produtivo (IP) (canto maior sexa o dato da columna IP, mellor) e 2) Unha elevada calidade (canto maiores sexan os datos das columnas ESPIGA, DMO e PB, mellor).
