Galego
A Comisión Europea acaba de publicar os resultados dunha enquisa sobre o consumo de viño entre os consumidores de dous importantes países produtores, España e Francia, e de dous destacados consumidores e importadores de viño, como son Alemaña e o Reino Unido. En total realizáronse 2105 entrevistas a consumidores do catro estados.
A modo de resumo, destaca a preferencia dos consumidores británicos cara aos viños varietais, moi por riba das preferencias en países produtores, máis dirixidas cara aos viños con indicación xeográfica, así como a súa maior inclinación cara a viños de fóra da UE. Destaca tamén o desinterese de franceses e británicos sobre viños de baixa gradación e a alta preocupación de alemáns sobre as referencias á saúde nas etiquetaxes dos viños.
Máis en detalle, este é o perfil dos consumidores de viño europeos que arroxa o estudo:
Nivel de consumo: Moito máis consumo diario en España e Francia que en Alemaña ou Reino Unido
Para o conxunto dos 4 países analizados, un 58% consume viño polo menos unha vez á semana. Máis do dobre de frecuencia diaria en Francia e España (16% e 19% respectivamente) que nos países consumidores netos (5% de Alemaña e 7% en Reino Unido). O 18%/19% beben menos dunha vez ao mes en Alemaña e Reino Unido respectivamente.
Tipo de viño: Británicos e Alemáns beben máis viño branco que franceses e españois
O consumo de viño en España é sobre todo de tinto (62%), mentres que en Reino Unido beben case tanto tinto como branco (38%/37%). En Francia bébese moito viño tinto (48%) pero tamén rosado (26%). En Reino Unido, e ademais da importancia do viño branco que tamén se dá en Alemaña, é alto o consumo de viños rosados (13%) e de espumosos (10%).
Etiquetaxe: Os británicos valoran máis a variedade coa que se elaborou o viño que a orixe xeográfica
Franceses e españois prefiren con claridade os viños con DOP ou IXP (38% e 43% respectivamente). En Reino Unido a preferencia é maioritariamente (42%) polos viños varietais, fronte a apenas un 10% de consumidores que optan por viños con DOP ou IXP e un alto 28% de quen “non saben” o que consomen.
En Alemaña as preferencias están máis equilibradas entre quen prefiren viños con DOP/IXP (33%) e quen prefiren varietais (31%), coa maior porcentaxe dos 4 países en preferencia de viños sen indicación xeográfica (11%).
En canto á orixe UE/non-UE do viño, españois, franceses e alemáns mostran unha clara preferencia polos viños da UE (92% en caso de España) mentres os consumidores de Reino Unido divídense entre viños de dentro e fóra da UE (38% e 37% respectivamente) e unha cuarta parte deles non saben cal é a orixe do viño que consumiron.
Criterios de compra: O prezo é o principal factor
No conxunto do catro mercados o prezo é o principal factor de compra (20% aínda que non moi distanciado doutros como a variedade (17%), a orixe do viño (15%), signos de calidade presentes na etiquetaxe (12%) ou recomendación de familiares ou profesionais (11%).
Con todo, existen certas diferenzas segundo os países. En Reino Unido o criterio principal é o prezo, mentres en Alemaña din preferir a marca, en Francia os signos de calidade nas etiquetas e en España a orixe do produto.
A variedade de uva é máis importante como criterio de compra en Reino Unido (22%) que en Francia (17%), Alemaña (16%) ou España (13%).
