Publicada a orde de Medio Rural que permite adiantar 18,5 millóns a gandeiros e agricultores

Publicidade
Publicada a orde de Medio Rural que permite adiantar 18,5 millóns a gandeiros e agricultores

O Diario Oficial de Galicia (DOG) publica hoxe a orde da Consellería do Medio Rural que permite anticipar ata o 50% do importe de determinadas axudas xestionadas por este departamento e cofinanciadas polo Fondo Europeo Agrícola de Desenvolvemento Rural (Feader) no marco do Programa de Desenvolvemento rural (PDR) de Galicia 2014-2020. Esta medida foi aprobada na última reunión do Consello Agrario de Galicia. 

Trátase dunha medida aprobada polo Consello da Xunta e que forma parte do Plan de liquidez da Consellería co fin apoiar aos agricultores, gandeiros e silvicultores galegos ante o descenso de ingresos provocado pola crise da Covid19.

Ata o momento os anticipos nestas ordes de axudas eran do 10% do importe total da achega, ampliándose agora ata o 50% co fin de mellorar a liquidez dos beneficiarios destas subvencións. Esta mellora supón o adianto duns 18,5 millóns de euros por este concepto. Ademais, e como novidade, esta medida porase en marcha sen necesidade de que os beneficiarios de ditas achegas presenten avais das entidades bancarias.

Flexibilización dos requisitos das axudas

Doutra banda, co mesmo fin de axilizar os trámites, establécese que a execución parcial do proxecto subvencionado, relacionada directa ou indirectamente coa crise da covid-19, non suporá sanción ou penalidade algunha para os beneficiarios das axudas. Así mesmo, poderanse pagar aqueles gastos incorridos ata o momento de decretarse o estado de alarma, aínda que a actividade para a que foi concedida a axuda non se puidera levar a cabo. Os solicitantes poderán, polo tanto, presentar modificacións dos proxectos presentados e mesmo efectuar a renuncia expresa á axuda, sen que iso derive en sanción ou penalidade algunha.

Tanto o abono do anticipo como a exención da constitución de garantías serán aplicables a unha serie de liñas de subvencións. Son as destinadas á prevención dos danos causados aos bosques por incendios, desastres naturais e catástrofes en montes veciñais e en Sofor, as convocadas para apoiar investimentos en explotacións agrícolas, agricultores mozos ou pequenas explotacións e as habilitadas para o apoio aos investimentos nas explotacións agrícolas especializadas en produción vexetal. Tamén, ás que serven para fomentar as instalacións e equipamentos en común, a utilización de maquinaria agrícola en réxime asociativo e as de transformación e comercialización de produtos agrarios.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información