Galego
A asociación Ovica, que agrupa ós principais produtores de ovino e cabrún de Galicia, proxecta poñer en marcha unha escola de pastores no sur ourensán. Trátase dunha proposta formativa específica en gandería extensiva e máis centrada na produción con ovellas e cabras. Terá un carácter principalmente práctico e levarase a cabo implicando 19 concellos do sur ourensán, dende Xinzo de Limia ata Viana do Bolo.
A iniciativa está apoiada pola Fundación A Caixa. Este mes tivo lugar a presentación de todos os proxectos seleccionados a nivel estatal, na sede de Fundación La Caixa en Madrid, e ó mesmo tempo comezaron as accións da primeira fase da Escola, coas roldas de presentación desta iniciativa ás distintas entidades implicadas no territorio.
Presentación das iniciativas apoiadas por Fundación La Caixa.
O plan de acción ten como obxectivo a fixación de poboación no rural a través da formación en gandería extensiva, da que poidan xurdir iniciativas para que os espazos sexan de novo ocupados polo gando, mantendo a paisaxe e axudando á loita contra os incendios.
Para isto seleccionouse a zona de acción que comprende os concellos de A Gudiña, A Mezquita, Baltar, Castrelo do Val, Chandrexa de Queixa, Cualedro, Laza, Monterrei, Oímbra, Os Blancos, Riós, Sarreaus, Trasmiras, Verín, Viana do Bolo, Vilar de Barrio, Vilardevós, Vilariño de Conso e Xinzo de Limia, cos que se están a levar a cabo as primeiras reunións para concretar os pormenores do proxecto.
Ademáis dos Concellos, haberá participación doutros organismos coma a Deputación de Ourense e os GDR locais, e ó atoparse na primeira fase, está aberto á participación doutras entidades relevantes do sector e o territorio.
Control OJD
