As queimas de restos agrícolas e forestais quedan prohibidas en Galicia desde hoxe e ata novo aviso. As previsións meteorolóxicas para os próximos días e as condicións actuais de vento levaron á Consellería do Medio Rural a suspender as queimas. Esa decisión implica que todos os permisos xa concedidos quedan cancelados e carecen de validez.
A decisión tomouse tras avaliar a evolución da situación meteorolóxica e unha vez analizados polo miúdo os diferentes indicadores técnicos que inciden no risco de lume. Tamén tendo en conta que a normativa –Decreto 105/2006, polo que se regulan medidas relativas á prevención de incendios forestais, á protección dos asentamentos no medio rural e á regulación de aproveitamentos e repoboacións forestais– prohibe as queimas cando as condicións meteorolóxicas poidan dificultar o seu control, especialmente nos días de vento.
Así mesmo, a Consellería do Medio Rural pide colaboración da cidadanía para que extreme as precaucións e denuncie calquera actividade incendiaria da que teña coñecemento, dado que desde hoxe non está permitido o uso do lume para ningunha actividade agrícola e forestal.
Este fin de semana rexistráronse lumes cunha superficie queimada superior ás 20 hectáreas en Cualedro, Vilariño de Conso ou en Lobios (Ourense).