Previsión de boa colleita de cereais en España

O Ministerio de Agricultura estima que a nova colleita para a campaña de comercialización de cereais 2025/2026 situarase arredor dos 23,3 millóns de toneladas, o que significaría un incremento do 15 % respecto dos 20 millóns da anterior.

A directora xeral de producións e mercados agrarios, Elena Busutil, reuniuse hoxe coas organizacións e entidades representativas dos sectores de cereais, oleaxinosas e leguminosas gran para facer balance do peche da campaña de comercialización 2024/25 e analizar as estimacións da 2025/26, iniciada o pasado 1 de xullo.

Para esta nova campaña, a superficie cultivada estímase en 5,4 millóns de hectáreas, lixeiramente superior á precedente. As abondosas precipitacións e as temperaturas suaves da primavera favoreceron o desenvolvemento dos cultivos de cereais de inverno, así como o incremento da superficie dos de primavera, colza e leguminosas gran.

Con estas condicións, as estimacións apuntan a que se producirán novos incrementos de rendemento que darán lugar a producións moi por enriba da media. Agárdase que estes bos rendementos permitan uns ingresos axeitados aos produtores nun contexto de contención das cotizacións globais.

Na xuntanza fíxose balance da campaña 2024/25, caracterizada por un considerable incremento produtivo dunha media do 80 % respecto da anterior, que estivo moi minguada pola seca. A produción total acadou un volume de 20 millóns de toneladas. Este importante incremento produtivo debeuse ás condicións climáticas axeitadas durante o desenvolvemento dos cultivos. A superficie cultivada na última campaña foi de 5,3 millóns de hectáreas, un 10 % máis ca na anterior.

A produción de oleaxinosas superou o millón de toneladas, cun incremento do 8 % respecto da campaña anterior, nunha superficie cultivada tamén semellante, por enriba das 867.000 hectáreas. En canto ás leguminosas gran, a produción incrementouse nun 72 % e acadou un volume total de 0,6 millóns de toneladas, cultivadas nunha superficie de 0,5 millóns de hectáreas, similar á do ano anterior.

O balance de cereais, oleaxinosas e leguminosas en España presenta un importante déficit comercial e existe unha dependencia das importacións de gran para alimentar a ampla cabana gandeira e para asegurar o subministro ás fábricas de pensos, das que é o primeiro país produtor da Unión Europea.

O consumo medio de cereais sitúase arredor dos 37 millóns de toneladas, das que preto de tres cuartas partes se destinan a alimentación animal, mentres que a produción media nacional sitúase arredor dos 23 millóns de toneladas. Esta fenda acentúase en anos de seca, como ocorreu na campaña 2023/24.

Na xuntanza tamén se expuxeron os datos de aplicación dos pagos directos en terras de cultivo (ecorréximes e axudas asociadas) en 2024, e as novidades do Plan Estratéxico da Política Agraria Común (PAC) aprobadas para o ano 2026 que atinxen ao sector dos cultivos herbáceos.

A Subdirección Xeral de Análise, Coordinación e Estatística presentou as súas novas operacións estatísticas que permiten un avance no mellor seguimento e coñecemento dos mercados agrarios.