Galego
A Federación Rural Galega (Fruga) trasladou nunha nota de prensa a súa preocupación polas incertidumes que hai en torno á próxima vendima. A organización agraria considera que adegas e viticultores teñen que ter información e apoio claro por parte da Xunta, un apoio que considera que falta.
Para a Fruga, é prioritaria a convocatoria dunha Mesa do Viño na que as distintas partes do sector poidan abordar cuestións como os prezos da uva, prazos de pago ou coñecer en detalle o ‘préstamo vendima’ anunciado estes días pola Consellería do Medio Rural.
Medio Rural anunciou que as adegas poderán optar a un préstamo en condicións vantaxosas para financiar a compra de uva. Trataríase dun préstamo cun ano de carencia e a devolver en catro anos. Desde a Fruga demandan información sobre os custos financieiros que ese préstamo terá para as adegas, pois entenden que tras o anuncio da Xunta hai “letra pequena” que falta por coñecer. “Parece claro que o primeiro sector que se vai beneficiar desta medida será a banca”, valoran.
A organización agraria propón, en calquera caso, que o acceso a eses préstamos estea ligado a uns compromisos de prezos da uva e prazos de pago ós viticultores por parte das adegas.
Protocolo na vendima fronte ó coronavirus
Outra cuestión que preocupa á Fruga é a ausencia -din- dun protocolo nos traballos de vendima fronte ó coronavirus. A organización agraria sinala que lle solicitou por escrito eses protocolos a Sanidade e Medio Rural o pasado 17 de xullo, sen obter resposta ata o de agora.
