Galego
Labores de plantación levadas a cabo estes días no Courel
A próxima semana finaliza a campaña de plantacións de bosques de mellora do hábitat oseiro na Serra do Courel, desenvolta pola Fundación Oso Pardo dentro do proxecto LIFE Oso Courel. As plantacións realizáronse en oito Montes Veciñais en Man Común dos concellos de Folgoso do Courel e Quiroga e outros terreos, previo acordo cos responsables e propietarios dos montes e obtención das correspondentes autorizacións ambientais e forestais cun total de 55.000 árbores e arbustos autóctonos. Para as actuacións de plantación contratouse a desempregados da zona.
Para levar a cabo os traballos contratouse a persoas desempregadas da zona
A plantación realizouse cos plantóns procedentes das sementes recollidas polos técnicos do proxecto LIFE nas mesmas zonas, e posteriormente sementadas e coidadas en viveiros colaboradores do proxecto. Unha parte importante das plantas foron producidas no Viveiro Forestal de Os Trollos (Bóveda, Lugo), pertencente á Consellería do Medio Rural da Xunta de Galicia. As especies utilizadas nas plantacións foron principalmente cerdeira (Prunus avium) e arraclán (Frangula alnus), aínda que tamén se plantou bidueiro (Betula alba), maceira silvestre (Malus sylvestris), mostallo (Sorbus aria) e serbal (Sorbus aucuparia).
Repoboación de montes veciñais
A campaña consistiu nunha serie de actuacións progresivas ao longo de varios meses. Desde novembro de 2019 dúas máquinas retroarañas estiveron realizando os traballos de furado e preparación do chan para garantir a boa implantación das árbores e arbustos. O pasado mes de xaneiro seleccionáronse mediante convocatoria pública dez persoas desempregadas dos concellos do proxecto LIFE Oso Courel, que foron contratadas para a formación de dúas cuadrillas de traballo, ás que se dotou con vehículos todoterreos, remolque e material e ferramentas de traballo. Entre febreiro e este mes de abril as cuadrillas plantaron as 55.000 árbores e arbustos autóctonos formando pequenos bosquetes de enriquecemento e mellora do hábitat.
As plantacións foron realizadas en 8 CMVMC de Folgoso do Courel e Quiroga e en montes privados previo acordo cos propietarios
Ademais de mellorar o hábitat para o oso pardo e o resto da biodiversidade, estas accións contribúen a incrementar a cobertura forestal e a calidade ambiental dos montes veciñais, aumentando o valor dos servizos ecosistémicos que producen estes montes, como a captación de carbono ou a conservación de recursos hidrolóxicos.
Os traballos continuarán no outono de 2020
O estado de alarma decretado polo Goberno como consecuencia da pandemia de Covid-19 obrigou a establecer medidas de control e á parada temporal dos traballos durante a restrición aos labores non esenciais. A actividade retomouse posteriormente unha vez establecidas as medidas necesarias de protección e prevención de contaxio e o distanciamento entre os traballadores nas zonas de plantación. A colaboración dos traballadores no desempeño dos labores coas máximas garantías de seguridade sanitaria foi fundamental para poder finalizar esta campaña sen incidentes.
O LIFE Oso Courel é un proxecto financiado pola Comisión Europea desde o ano 2016 e que finaliza este ano
Os traballos continuarán no outono de 2020 para seguir plantando en novas zonas de interese e cumprir os obxectivos do proxecto LIFE. O LIFE Oso Courel é un proxecto financiado pola Comisión Europea, que está a ser desenvolvido entre 2016 e 2020 pola Fundación Oso Pardo, a Asociación Galega de Custodia do Territorio e a Xunta de Galicia, co apoio da Fundación Biodiversidade e a empresa Naturgy, co obxectivo de favorecer a convivencia entre osos e humanos na Serra do Courel, zona de recente expansión da especie.
A Fundación Oso Pardo (FOP) é unha ONG conservacionista constituída en 1992 co obxectivo de contribuír ao estudo e conservación do oso pardo, do seu hábitat e da contorna cultural no que se desenvolve esta especie ameazada. Dado que se trata dunha das máis coñecidas e queridas a nivel popular de toda a fauna ibérica, e que a súa presenza é o mellor indicador biolóxico do bo estado de conservación do territorio que habita, as actuacións emprendidas teñen unha ampla repercusión.
