Piden que o prazo de solicitude da PAC se amplíe ata o 31 de maio

O Ministerio de Agricultura asegura que consultará nos próximos días ás Comunidades Autónomas e organizacións agrarias para tomar unha decisión. A Comisión Europea autoriza aos Estados a prolongar o prazo de presentación de solicitudes ata o 15 de xuño

Publicidade
Piden que o prazo de solicitude da PAC se amplíe ata o 31 de maio

As organizacións agrarias galegas coinciden en reclamar que o Ministerio de Agricultura autorice unha prórroga do prazo de presentación das solicitudes da PAC, polo menos, ata o 31 de maio. En declaracións a Campo Galego, desde o Ministerio sinalan que “a decisión tomarase nos próximos días, despois de consultar ás Comunidades Autónomas e ás organizacións agrarias”.

A Comisión Europea autorizou este martes aos Estados Membro da UE para ampliar o prazo de presentación das solicitudes da PAC, se o consideran oportuno, ata o 15 de xuño, para que os agricultores realicen a súa solicitude de axuda para pagos directos e certas solicitudes de pago correspondentes ao desenvolvemento rural.

De momento, o Ministerio ampliou, ata o próximo 15 de maio, o prazo de presentación da solicitude única dos pagos directos á agricultura e gandería para o ano 2016. Unha ampliación que desde a Unión de Pequenos Agricultores (UPA), o sindicato estatal no que está integrada Unións Agrarias, consideran insuficiente xa que estiman que preto do 50% das PAC en todo o Estado están aínda sen presentar.

Para Óscar Pose, de Unións Agrarias, “15 días máis de prazo son innegociables, porque o proceso iniciouse con moito atraso, o 1 de marzo, con bastantes problemas na aplicación da PAC, e nestes momentos os gandeiros están ensilando a herba, co que tampouco teñen tempo de acudir á oficinas para presentar as solicitudes”. Pose subliña que “os prazos da PAC non se cumpren non polos gandeiros, senón pola Administración e os problemas na súa aplicación informática” e pide ao Ministerio que “canto antes diga ata canto se amplía o prazo de presentación” de solicitudes.

SLG: “A administración non cumpriu os seus prazos, o menos é que amplíe o período de solicitude”

Na mesma liña pronúnciase Xosé Ramón Cendán, membro da Executiva do Sindicato Labrego Galego (SLG), para quen “se a Administración non fixo os seus deberes, o menos é que deixen tempo aos gandeiros para presentar as solicitudes”. Cendán asegura que “se o 1 de marzo a Xunta tivese as solicitudes cargadas na web non habería que pedir ampliación de prazo de presentación”, e advirte de que “a estas alturas a Consellería aínda está a cargar datos das parcelas no programa da PAC”.

Pola súa banda, Francisco Bello, secretario xeral de ASAJA-Galicia, defende que “o lóxico é que, como moi tarde o prazo de solicitude acabe o 31 de maio, que sería máis que suficiente”. “De amplialo ata o 15 xuño -asegura-, produciríase un agravio comparativo cos agricultores e gandeiros que si presentaron a súa solicitude en tempo e forma e, ademais, acumularíase un atraso burocrático que tería consecuencias no prazo de pago das axudas da PAC, como xa vimos este ano”.

No que si coinciden todos é en pedirlle ao Ministerio que a prórroga se faga efectiva canto antes para acabar coa incerteza dos agricultores e gandeiros.

Problemas na PAC deste ano detectados por UPA

Desde UPA detectan unha serie de problemas na PAC deste ano que atrasaron a presentación das solicitudes de axudas. Van desde os derivados da aplicación informática de xestión das solicitudes, ata o atraso na asignación de dereitos de pago básico en varias Comunidades Autónomas, así como a resolución de moitos expedientes ou as sucesivas modificacións do Coeficiente de Admisibilidade de Pastos.

Outra das causas do atraso na xestión das solicitudes é que esta PAC mantén “unha gran incerteza” para os mozos e mozas que se acaben de incorporar ao sector e que se acolleron á Reserva Nacional. “Estes agricultores e gandeiros aínda non coñecen os seus dereitos definitivos, polo que non saben que declarar na solicitude”, aseguran desde UPA. Tampouco se comunicaron definitivamente todas as cesións e transferencias de dereitos.

Desde UPA consideran oportuno ampliar o prazo ata o 31 de maio, para logo dispoñer de quince días máis para as modificacións das solicitudes xa rexistradas que se consideren oportunas.

 

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información