O anteproxecto da Lei de benestar de animais domésticos, deseñado pola Xunta, preocupa a diversas organizacións do rural, que piden cambios para diferenciar os animais de compaña dos animais de traballo no rural. Unións Agrarias advirte de que, con ese proxecto de lei na man, as explotacións que teñan mastíns para defenderse de ataques do lobo poderían ser sancionadas por poñer en risco a vida do animal.
A organización agraria, que mantivo recentemente unha reunión coa Mesa pola Caza de Galicia, entende que os cans de traballo no rural deben ter un trato específico, en particular os animais dedicados ó coidado ou ó traballo co gando e tamén aqueles que participan en actividades cinexéticas ou simplemente na custodia de instalacións.
Unións considera que os cans enfrontan no rural situacións de risco que non se poden evitar, como a defensa dos rabaños de ataques de depredadores ou a participación en batidas de xabarín. A organización sinala as batidas como imprescindibles para manter o equilibrio da poboación de xabarín e para evitar un exceso de danos sobre a agricultura.
Desde Unións tampouco son partidarios de penalizar o intercambio de cachorros, feito entre profesionais e sen ánimo de lucro, pois é unha práctica convinte para evitar problemas de consanguinidade.