“O viño é un xogo, un labirinto de sorpresas que require participación activa”, sinalou o director do Instituto Galego do Viño durante a inauguración do curso académico 2015-16 celebrado na Cidade da Cultura de Galicia.
Neste sentido, Xoán Cannas explicou aos 25 alumnos e alumnas seleccionados para participar desde hoxe na 3ª edición do Curso Superior de Catador Profesional que “neste máster trataremos de que perdades os prexuízos e descubrades que hai máis aló da fronteira do sabor, onde empezan os enigmas vitivinícolas”.
Durante o acto, que contou coa presenza do xerente de Galicia Calidade, Alfonso Cabaleiro; a xerente da Fundación Cidade da Cultura, Beatriz González; así como de representantes dos sectores do viño, da hostalería e do turismo, entregouse á segunda promoción do Curso os títulos, mencións especiais e o premio “Turismo Rías Baixas” ao mellor alumno, que este ano recaeu, ex aequo, en Elísabet Castro Vázquez, do restaurante Mesón Docampo (Vilalba) e Marcos Docasal Pereira, da distribuidora Vía XVIII (Lugo).
Paco Berciano destaca as potencialidades do minifundio vitivinícola de Galicia
Á súa vez, Paco Berciano, unha das figuras fundamentais do viño en España, pronunciou a lección inaugural na que lembrou aos matriculados que “o mundo do viño é o único no que podes converter o teu traballo nun gran pracer”. Por elo, o director e copropietario de Alma Vinos Únicos e da vinoteca burgalesa El Lagar, considerada unha das mellores tendas especializadas do país-, convidou os alumnos a “descubrir e compartir a humildade e a paixón que caracteriza á xente do viño, porque desta forma poderedes entender porqué o viño é así”.
Berciano foi máis aló e subliñou que “o minifundismo vitivinícola de Galicia permitirá a esta terra elaborar os mellores viños de España”.
Un máis de 700 horas con recoñecidos expertos do mundo do viño
A partir de hoxe, e ata finais de xuño, a Cidade da Cultura acollerá o máster de 700 horas -teóricas e prácticas- de duración que serán impartidas por recoñecidos expertos a nivel internacional como Ferrán Centelles, José Luís Mateo, César Cánovas, Juancho Asenjo, Michael Wöhr, César Ruíz, e o propio Xoán Cannas, entre outros.
“Trátase de ofrecer unha formación integral da xestión do viño ao máis alto nivel”, subliñou Xoán Cannas. Así, viticultura e vinificación, xeografía vitivinícola, outros produtos e sobremesas, sala e adega, así como as técnicas de márketing e comunicación aplicadas ao viño, conformarán a programación teórica, que estará complementada con visitas a viñedos, adegas e feiras, ademais da realización dun proxecto ou prácticas profesionais.