Os gandeiros denuncian que a industria “nos impón producir leite a perdas”

Concentración en Santiago convocada pola Organización de Productores de Leche (OPL). Aseguran sentirse indefensos “cunha Administración que mira para outro lado ante os abusos da industria e da distribución”.

Os gandeiros denuncian que a industria “nos impón producir leite a perdas”

Concentración dos gandeiros esta mañá.

Arredor dun cento de gandeiros concentráronse esta mañá en Santiago de Compostela diante da Xunta de Galicia para denunciar a súa indefensión ante uns prezos que lles está a impoñer a industria nos contratos lácteos que, segundo os produtores, sitúanse por debaixo dos custos de produción.

A mobilización estaba convocada en solitario pola Organización de Productores de Leche (OPL). O seu presidente, Manuel Iglesias, asegurou que “estamos nunha situación moi complicada debido a un escenario no que a industria nos quere impoñer un prezo de 28-30 céntimos por litro de leite para todo o ano, cando os custos de produción están en torno aos 34 céntimos”.

Ante esta situación, o representante dos gandeiros criticou que “a Administración está mirando para outro lado, deixando todo en man das Organizacións de Produtores, unhas organizacións que aínda se están fundando e que non teñen capacidade abonda para negociar coa industria e influír nos prezos”.

“Asinamos un contrato a seis meses: unha parte vai a 29 céntimos e a outra non sabemos”

En declaracións a Campo Galego, un gandeiro de Santa Comba que prefire manter o anonimato, explica que “no noso caso o contrato que asinamos foi a 6 meses e unha parte do leite fixáronnolo en 29 céntimos, e outra parte a prezo descoñecido, en función dunha serie de factores de mercado”.

Coincide tamén na percepción de que “a Administración mira para outro lado evitando enfrontarse cos que nos fixan os prezos: a industria e a distribución, porque o consumidor podería pagar sen problema 2 céntimos máis por litro de leite, pero para nós pasar de cobrar 29 a 31 céntimos si que é un problema”.

“As organizacións de produtores están sendo anuladas pola industria e a distribución”

Manuel Antelo, outro gandeiro de Santa Comba, lembra que “o gandeiro é a parte feble da cadea”. Sen embargo, considera tamén que “o paquete lácteo non resolve o problema e as Organizacións de Produtores, a industria e a distribución están tentando anulalas”.

Ao igual que o resto dos gandeiros, Manuel Antelo afirma que “estamos vendendo o leite nunha banda de entre 27 e 28 céntimos, cando os custos de produción están entre 34 e 36 céntimos por litro”. Neste sentido, asegura que “estamos producindo a perdas, porque aínda que as materias primas baixaron, os custos fixos das explotacións seguen aumentando”.

Ademais, Manuel Antelo denuncia que “no último mes estamos vendo como a industria está repercutindo nos gandeiros a multa de 80 millóns de euros que lle impuxo Competencia por pactar os prezos”.

“Gastei máis de 30 millóns en mercar cota e agora ese capital queda en nada”

José Luis Ríos, un gandeiro de Trazo, tamén advirte que “levamos 4-5 anos cobrando menos prezos que en toda España, con Comunidades nas que o o prezo do leite é 6 céntimos superior a Galicia”.

Por último, José Luis pon o foco sobre outro dos problemas do sector lácteo galego: a perda dos centos de millóns investidos na compra de cota láctea. “Gastei máis de 30 millóns de pesetas en compra de cota, e agora quedei sen nada, mentres noutros países, nos que a cota asignada se correspondía coa demanda, non tiveron ese problema e agora sácannos ese dereito sen ningún tipo de compensación”, lamenta.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información