A asemblea de gandeiros da Coruña, que estivo bloqueando o Carrefour de Alfonso Molina durante 13 días, acordou esta tarde sacar os tractores da cidade herculina para bloquear a partir desta noite o Centro Loxístico de DIA en Santiago de Compostela.
Tras os acordos dos últimos días con Carrefour, con Lidl, con Eroski e hoxe con Gadis, os gandeiros consideran que DIA é a principal cadea de distribución que está a prexudicar os seus intereses. Para xaneiro, segundo os produtores, DIA ten anunciada unha baixada de 4 céntimos nos prezos de partida das súas poxas semanais de compra de leite.
Os produtores son conscientes de que a confrontación con DIA pode ser longa pero amósanse dispostos a dar a batalla ata o final, pois entenden que se quedase unha cadea no mercado tirando á baixa cos prezos convertiría en papel mollado os acordos aos que os gandeiros chegaron cos outros grupos (Eroski, Lidl, Carrefour e Gadis).
Principio de acordo con Alcampo
Na asemblea de hoxe á tarde na Coruña, Óscar Pose, representante de Unións Agrarias na Plataforma en Defensa do Sector Lácteo Galego, informou aos gandeiros dun principio de entendemento con Alcampo. A cadea francesa quedou en concretar mañá unha reunión cos gandeiros e xa lles anunciou que está disposta a aceptar medidas similares ás pactadas con Carrefour.
Con Carrefour chegouse ao acordo de que subirá 2 céntimos aos seus provedores de marca branca -Lactalis e Leche Celta-, unha suba que as industrias repercutirán en xaneiro aos produtores.
Os gandeiros temen que sen DIA os acordos co resto da distribución queden en papel mollado
O problema radica, como era previsible, en que o leite que Lactalis e Leche Celta comercializan con Carrefour é só unha parte da súa produción. Lactalis, que tamén lle vende marca branca a DIA, quedou de cuantificar estes días o incremento que lle fará chegar aos gandeiros. Con Leche Celta cóntase con que, en principio, haxa menos problemas xa que a cooperativa portuguesa tamén se viu beneficiada polos acordos con Lidl e con Eroski e co que, previsiblemente, se pechará con Alcampo. Os provedores de marca branca de Alcampo son Lactalis e Leche Rio.
Así as cousas, os gandeiros concentrarán agora os seus esforzos sobre DIA, que se prové de leite en, entre outras industrias, Central Lechera Asturiana, Reny Picot, Lactalis e Feiraco, segundo se explicou esta tarde na asemblea da Coruña.
En canto ás asembleas gandeiros da Plataforma en Lugo e en Lalín, representantes das mesmas xa lle trasladaron aos gandeiros da Coruña que proporían nas súas respectivas asembleas que se celebrarán esta noite secundar a decisión que se adoptase na Coruña esta tarde.