Galego
A Organización Galega de Comunidades de Montes, xunto a Adega, CIG, Ecoloxistas en Acción, Fruga, Ingateco, Orgaccmm e o SLG, presentou en Compostela unha declaración conxunta para reclamar unha nova lei de montes veciñais que reforce o carácter xermánico destas terras e promova unha xestión sustentable e multifuncional.
As organizacións reivindican que a futura normativa debe reforzar o carácter xermánico dos montes veciñais, garantindo que sigan sendo propiedades colectivas da veciñanza comuneira.
Os montes veciñais en man común ocupan un cuarto do territorio galego e un terzo da superficie forestal. “Son terras inalienábeis, imprescritíbeis, indivisíbeis e inembargábeis e sen asignación de cotas”, indican dende a organización.
A declaración presentada en Compostela reclama que a futura lei recoñeza a titularidade veciñal como unha máis, equiparándoa en dereitos ás titularidades pública e privada. “Porén a Consellaría do medio rural pretende mediante a nova lei permitir a privatización dos montes veciñais para entregarllos á industria madeireira”, explican.
Ademais, as organizacións anunciaron un calendario de reunións cos partidos políticos e coa Federación Galega de Municipios e Provincias para expor as súa demandas e buscar apoios.
As entidades asinantes consideran que a protección dos montes veciñais é clave para garantir a sustentabilidade e o beneficio das terras. Por iso, piden á Xunta que rectifique sobre a súa proposta para apostar por unha xestión que respecte a súa natureza comunal.
Control OJD
