Galego
Os gandeiros son conscientes de que a crise de prezos en orixe do leite ten múltiples causas pero tamén saben que as ofertas de leite nas cadeas de distribución, lonxe de arranxar o problema, empeórano. En Euskadi téñense detectado nas últimas semanas prezos a 47 céntimos, en Girona hai un caso denunciado polo sector a 29 céntimos e en Galicia os produtores advertiron onte dunha oferta a 50 céntimos.
Estes prezos de comercialización, que organizacións agrarias e cooperativas consideran irregulares e claros casos de vendas a perdas, están a ser denunciados ante a Agencia de Información y Control Alimentario (AICA), dependente do Ministerio de Agricultura.
En todo o Estado, a maioría das cadeas de distribución contan con leite en oferta por baixo dos 60 céntimos, o umbral que cooperativas e organizacións agrarias marcan como liña vermella de referencia. A maioría das promocións rondan os 55-60 céntimos, se ben onte xerouse gran malestar no sector gandeiro galego por unha oferta de Campo Nuestro, a marca branca de Gadis, a 50 céntimos en compras de 6 unidades (53 céntimos un brik so), unha promoción criticada tanto desde a Asociación Galega de Cooperativas Agroalimentarias (Agaca) como desde Unións Agrarias, que anunciou a presentación dunha denuncia ante a AICA.
Oferta actual de Gadis.
Informe
A Agencia de Información y Control Alimentario (AICA) é a encargada de velar polo cumprimento da Ley 12/2013 de Mejora de la Cadena Alimentaria, que naceu para tratar de reequilibrar o poder de negociación entre as distintas partes da cadea, de xeito que se reducise o uso de determinados produtos como reclamo. O aceite e o leite son os dous grandes cabalos de batalla que se lle presentan á AICA, se ben polo de agora a súa actuación logrou escasos éxitos no escenario lácteo.
Preguntada días atrás sobre a resolución das investigacións abertas no caso do leite, a AICA remitiunos á presentación dun próximo informe sobre a súa labor. O organismo, dependente do Ministerio, adoita trasladarlle as propostas de sanción ás comunidades autónomas, con competencias na materia, se ben polo de agora, só trascenderon multas polas vendas de leite a baixos prezos nas comunidades de Murcia e de Cantabria.
