A sección ‘Noticias de empresa’ inclúe informacións de actualidade empresarial, así como as notas de prensa de firmas colaboradoras.

“O suministro de fertilizantes este ano está garantido pero os prezos son bastante inestables”

A cooperativa de segundo grao Delagro é unha das principais comercializadoras de fertilizantes en Galicia, Asturias e Cantabria. Falamos con Javier Caneda, responsable da área de Produción Vexetal , para ver como se presenta esta campaña

“O suministro de fertilizantes este ano está garantido pero os prezos son bastante inestables”

Javier Caneda, responsable da área de Produción Vexetal de Delagro

Tras un 2022 no que os prezos dos fertilizantes subiron até máximos históricos, esta campaña parece volver á normalidade tanto no suministro como nas cotizacións.

A piques de comezar a sementeira do millo, analizamos a situación con Javier Caneda, responsable da área de Produción Vexetal de Delagro, cooperativa de segundo grao que é unha das principais comercializadoras de fertilizantes tanto en Galicia como na cornixa cantábrica.

-Como se presenta a campaña 2023 de fertilizantes a nivel xeral?
Esta campaña 2023 preséntase moi complexa polos cambios e acontecementos que hai no mercado en canto a materias primas. Primeiro sufrimos unha forte suba de prezos no 2022, e logo a comezos deste 2023 houbo un abaratamento, sobre todo dos fertilizantes nitroxenados, polo descenso nos prezos do gas natural e do amoníaco. Polo tanto, estamos nunha auténtica montaña rusa en canto a prezos. A tendencia de inestabilidade de prezos está previsto que continúe durante a primavera deste ano.

-O pasado ano houbo dificultades para o subministro debido ao peche de varias plantas de fabricación polos elevados prezos do gas natural. Superouse este problema?
O ano pasado houbo problemas de peche de fábricas de fertilizantes e de disponibilidade dos mesmos no mercado polo forte encarecemento das materias primas, fundamentalmente o gas natural, que fixo que aos fabricantes non lles saíse rendible telas en funcionamento.

Agora ese problema xa está solventado e todas as plantas están en produción normal e non se contemplan problemas de desabastecemento. Ademáis, na loxística tamén hai un fluxo normal de mercadorías, grazas tamén a que os prezos dos fletes se abarataron.

-Como están os prezos das principais fertilizantes que se venden no mercado galego e da cornixa cantábrica?
Os prezos van acompasados aos do mercado, con certo retraso para o consumidor final. En xeral, os prezos están baixando, cunha estabilización neste momento. Estamos á expectativa de como evolucionan de cara á campaña de millo, onde se produce a maior parte do consumo de fertilizantes nesta rexión.

-No caso de Delagro, como vos estades a preparar para a campaña 2023 en canto a elaboración e venda de fertilizantes?
Delagro afronta esta campaña mirando como está a situación de materias primas, de disponibilidade e prezos de fertilizantes. Nun mercado tan inestable nas cotizacións, temos que ser prudentes en canto ás compras e ao stock. Neste sentido, imos comprando con cautela, non facendo a compra de toda a campaña a comezos de ano, como noutras épocas. Intentamos ofrecer a mellor relación calidade/prezo para os agricultores e gandeiros, e iso obríganos nun ano coma este a comprar a curto prazo aos fabricantes.

-Unha das novidades que tedes este ano no mercado é FERPLAN. En que consiste e que vantaxes lle aporta ao agricultor e gandeiro?
FERPLAN pretende realizar unha fertilización a medida de cada parcela e das necesidades de cada cultivo, cumprindo ao mesmo tempo coa nova lexislación sobre fertilización a nivel medioambiental. E todo isto priorizando que o gandeiro logre a máxima produción do seu cultivo. Creo que é unha ferramenta idónea para dar cumprimento dunha forma sinxela e práctica a todas esas necesidades.

Deixa unha resposta

O teu enderezo electrónico non se publicará Os campos obrigatorios están marcados con *