Galego
O concello lugués de Friol presenta o primeiro proxecto piloto en Galicia para reorganizar a propiedade agrícola a través das permutas, axilizando e abaratando o proceso de crear parcelas de maior tamaño con respecto ás concentracións parcelarias.
Este proxecto definirá a propiedade mediante permutas agrícolas voluntarias entre particulares, reorganizando unha superficie total dunhas 45 hectáreas.
O alcalde, José Ángel Santos asegura que “dende o Consello con este proxecto piloto, estase a dar un paso máis, tentando poñer en práctica por primeira vez en Galicia un instrumento que xa está definido dende 2015 na vixente Lei de mellora da estrutura territorial agraria de Galicia e que aínda non fora posto en práctica ata o de agora no territorio galego”.
A ferramenta permitirá realizar a reorganización de terreos nunha zona nun período aproximado de 6 meses -as concentracións parcelarias tardan de media 16 anos-, coa modificación da xeometría das parcelas agora existentes e, polo tanto, dos límites, accesos e valados existentes e a súa titularidade.
Sen ningún custo para os veciños
Segundo o alcalde, as zonas onde se situará a actuación estarán especificamente nas parroquias de Prado, Xiá e A Rocha, e serán beneficiarios deste ambicioso proxecto arredor de dez veciños, sen ningún custo para eles, xa que estará totalmente financiado a través de fondos públicos.
Os traballos a realizar consistirán no achegamento ao perímetro de actuación, estudo da caracterización da zona, análise da propiedade do terreo, anteproxecto de reestruturación, coa súa posterior tramitación ata que se obteña a aprobación da Dirección Xeral de Infraestruturas e, finalmente, proceder á repartición, marcación e transferencia á notaría do rexistro e finalmente ao seu rexistro.
Este instrumento concíbese como complementario a calquera outro mecanismo de reestruturación, pero é de gran interese para as áreas locais e específicas que están pouco cultivadas. Permitirase o acceso á terra das explotacións existentes, así como a agrupación de superficie para facilitar o acceso ás explotacións, suporá un valor engadido para aqueles propietarios que non cultiven nin exploten as súas terras, xa que as poñen en valor.
“A posta en marcha de iniciativas coma esta, de permutas agrícolas entre particulares, é unha necesidade evidente que se detecta desde hai anos, e agora, dende o Concello de Friol, e co apoio da Conselleria de Medio Rural, e AGADER , vaise facer realidade”, salientan dende a alcaldía.
Por último, o alcalde de Friol destaca que esta medida “forma parte dunha estratexia de maior rendibilidade ás explotacións, como xa se fixo no Concello coa subvención de ata o 50% de gastos notariais a aqueles veciños que intercambian as súas propiedades, medida que tivo moi boa acollida dende a súa posta en marcha”.
Outro proxecto en Castroverde
Outro concello lugués que está a poñer en marcha medidas para favorecer de xeito áxil e práctico a agrupación de parcelas é o de Castroverde.
En concreto, este municipio concede axudas a todas aquelas agrupacións de propiedades mediante a figura de permutas voluntarias entre titulares de parcelas agrarias e forestais, residan ou non no municipio. Un dos requisitos principais para que se aproben as subvencións é que se unifique, polo menos, un 20% o número das parcelas iniciais.
Unha vez que se abre o prazo de solicitude das axudas a veciñanza ten un prazo amplo de entre 8 e 10 meses, para que dea tempo a chegar a acordos voluntarios con outros titulares.
