O 18% dos españois coñece o queixo Tetilla pero só o 2% o consume habitualmente no fogar

Un estudo elaborado pola INLAC sitúa a este queixo galego como o sexto que máis se consume en España, a moita distancia do Manchego, que copa o 40% das vendas de queixos españois

Publicidade
O 18% dos españois coñece o queixo Tetilla pero só o 2% o consume habitualmente no fogar

Queixo Tetilla

Os queixos galegos teñen un gran camiño por diante para abrirse paso nun mercado español dominado claramente polos queixos manchegos. Ao seu favor xoga que o seu grao de coñecemento polos consumidores españois é alto: un 18% dos enquisados afirman coñecer o Queixo Tetilla, pero só no 2% dos casos é o máis consumido no fogar. Iso é o que se desprende do “Estudio del entorno de percepción del queso de origen español”, elaborado pola consultora Ikerfel para a Interprofesional Láctea (INLAC) e ao que tivo acceso Campo Galego.

O estudo, realizado entre marzo e xuño deste ano, tiña como obxectivo determinar a situación do queixo de orixe española de cara á súa promoción.

Grao de coñecemento: o Tetilla é o terceiro máis coñecido en España e o segundo no Noroeste

Neste sentido, o estudo da INLAC revela que o queixo Tetilla é o terceiro máis coñecido polos enquisados dentro dos queixos españois, cun 18% de respostas afirmativas, a gran distancia do queixo Manchego (56% de coñecemento) e do Cabrales (27% de coñecemento). O queixo da denominación Arzúa-Ulloa é citado por un 2% dos enquisados, mentres que o do Cebreiro e de San Simón da Costa teñen un 1% de coñecemento.

Por rexións, o Queixo Tetilla ten un gran coñecemento na zona Noroeste (Asturias e Galicia), cun 35%, o que o sitúa no segundo posto por detrás do Manchego (41% de coñecemento) e seguido de preto polo Cabrales (34%). Nesta zona o Arzúa Ulloa é coñecido polo 15% dos enquisados e o Queixo do Cebreiro polo 9%.

No resto do Estado, o queixo de Tetilla tamén ten un bo grao de coñecemento na zona Centro (24%) e no Levante (22%). Pola contra, baixan as respostas dos enquisados que o citan entre os queixos españois na rexión Norte-Centro (15% ) e sobre todo no Noreste -Cataluña e Aragón- (11%) e no Sur (10%), zonas estas dúas con máis presenza de queixos foráneos. En Madrid o queixo Tetilla é nomeado por un 17% dos enquisados e en Barcelona por un 20%.

INLAC_ESTUDO_QUEIXOS_COÑECEMENTO_QUEIXOS_ESPAÑOIS

Consumo: o consumo do queixo Tetilla baixa á sexta posición

Sen embargo, cando se lle pregunta aos enquisados cal é o queixo español máis consumido no seu fogar o queixo Tetilla baixa á sexta posición: cun 2% de fogares nos que é o queixo de referencia. O primeiro posto ocúpao o queixo Manchego, cun 40% de fogares nos que é o máis consumido, mantendo un equilibrio maior entre grao de coñecemento e consumo. En segundo lugar sitúase o García Vaquero, cun 5%, seguido do Queixo de Burgos (3%), Cabrales (3%) e Idiazábal (3%). O Arzúa-Ulloa é citado como o queixo máis consumido no fogar por un 1% dos enquisados en toda España.

O estudo da INLAC tamén ofrece datos de consumo no Noroeste (Galicia, Asturias). O queixo Manchego segue dominando o mercado dos queixos españois pero menos, cun 26% de fogares nos que é o máis consumido. O queixo de Tetilla medra a súa presenza como referencia nos fogares ata o 16% e o Arzúa-Ulloa ata o 9%.

INLAC_ESTUDO_QUEIXOS_COMPRA_QUEIXOS_ESPAÑOIS

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información