Nova presidenta á fronte de OVICA

Na última asemblea de OVICA (Asociación de Criadores e Criadoras de Ovino e Caprino de Galicia), que tivo lugar no pasado mes de marzo, levouse a cabo unha renovación parcial da xunta directiva, incluíndo a elección dunha nova presidenta.

María Jesús Crespo Bouzón foi escollida como presidenta de OVICA, tomando o relevo de Luis Miguel Rivera Otero, quen ocupaba o cargo ata o momento. Desde 2017, María Jesús é titular dunha granxa de ovino situada no concello coruñés de Aranga e forma parte da asociación desde ese mesmo ano.

Xa con María Jesús á fronte, a nova xunta directiva puxo en marcha diversos grupos de traballo destinados a afrontar os principais desafíos do sector. Entre as áreas prioritarias destacan a comercialización de años e cabritos, a xestión da la e a promoción e impulso da formación.