Galego
A área de Medio Rural, Mar e Mocidade da Deputación de Lugo colabora na posta en marcha da plataforma de venda en liña de produtos agroalimentarios Son de Lugo, a primeira que aglutina pequenos produtores das distintas comarcas da provincia.
A web, accesible desde este mércores para a venda, presentouse onte pola mañá nos Xardíns do Pazo de San Marcos, nun acto no que participaron a deputada Mónica Freire e representantes das doce firmas que se sumaron á iniciativa nesta primeira fase.
A deputada agradeceu a produtores e produtoras “o seu compromiso e dispoñibilidade para emprender este proxecto en común que xurdiu durante a pandemia polas propias necesidades que as asociacións agrogandeiras formularon á área de Medio Rural”
“O afundimento dos prezos pola falla de demandar por parte da hostelería e restauración fixo urxente buscar unha ferramenta que pretende que o valor engadido e a calidade diferenciada e contrastada repercuta nos produtores e produtoras e asegura unha vida digna no rural”, sostivo a responsable da área de Medio Rural, que contribuíu á posta en marcha da iniciativa con asesoramento técnico e que dará apoio e soporte económico á súa difusión.
Mónica Freire subliñou que “se trata dun proxecto aberto e animou a pequenas gandeirías e producións agrícolas que conten cun produto de calidade a valorar a súa incorporación á plataforma, unha iniciativa que nace con vocación de perdurar no tempo e que estamos seguras de que será exitosa”.
A deputada nacionalista Mónica Freire
Producións de calidade de todas as comarcas
A web ofrece unha ampla selección de produtos das distintas comarcas: queixos das denominacións de orixe Arzúa-Ulloa de Arqueixal, en Palas de Rei, e San Simón da Costa, da firma vilalbesa Don Gabino; viño da denominación de orixe Ribeira Sacra, da adega Proencia de Proendos, en Sober; legumes da Indicación Xeográfica Protexida Faba de Lourenzá da cooperativa Terras da Mariña; carne de Tenreira Galega Suprema da cooperativa A Carqueixa dos Ancares, carne de porco celta e poldro de cabalo de Pura Raza Galega de Céltico, afincada en Muras.
Tamén se poderán mercar botelos, androllas e outros embutidos da Montaña de Lugo elaborados por Embutidos Suarna; a pescada de Celeiro capturada con artes respectuosas co ecosistema mariño de Novomar e outros froitos do Cantábrico, con especial atención ao comezo da costeira do bonito de O Almacén do Peixe, marca comercializadora de Peixes Orol de Burela.
O catálogo de Son de Lugo complétano Milhulloa, que desde Palas de Rei produce en ecolóxico grelos deshidratados, herbas para infusións, especias e oleatos, e Muuhulloa, a marca de cosmética resultante da asociación das palenses Milhulloa e da monterrosina Granxa Maruxa, unha explotación familiar de lácteos ecolóxicos. Nos vindieiros días, tamén estarán dispoñibles para a venda en liña os produtos de horta da empresa riotortense Terras de Miranda.
A plataforma permite facer facer unha compra completa como se sinala na propia web – “será como ir de feira a golpe de clic” -, nun único envío nun máximo de dez 10 días e sen gastos de envío a partir de 56 euros de compra. Son de Lugo chegou a un acordo con Seur para a distribución, con especial atención aos alimentos que precisen refrixerado como a carne, o pescado ou os lácteos.
O coordinador do proxecto Román Sánchez, xerente da cooperativa ancaresa A Carqueixa, cunha exitosa experiencia na comercialización en liña da súa produción a través da web O Sabor dos Ancares, explicou na presentación que “o que diferenza Son de Lugo, fronte a outras plataformas de produtos, é a importancia que lles damos ás persoas que viven no rural. Aglutinamos proxectos innovadores, afinacados na terra, que axudan a cambiar a visión do rural e que tamén axudan a cambiar a visiíon do rural. Dase como inexorable a súa morte e temos que demostrar que hai moita vida e moito futuro nelas”.
Impulso para o relevo xeracional e a creación de oportunidades no rural
A presentación nos Xardíns do Pazo de San Marcos tamén serviu para coñecer as valoracións da iniciativa por parte dos produtores e produtoras. Pepe Cuadrado, da cooperativa Terras da Mariña, que reúne quince produtores e produtoras de fabas da IXP Faba de Lourenzá, destacou que o proxecto supón “unha oportunidade para avanzar en materias pendentes para o sector primario como son a visibilidade e os medios para chegar aos clientes finais”. Sinalou tamén que “temos unha media de idade no campo demasiado alta e botamos de menos xente nova que aposte nel, cremos que iniciativas deste tipo animan á xente a producir e quedar no rural”, sinalou.
Pola súa banda, Mª Carmen Sánchez, de Embutidos Suarna, sinalou que Son de Lugo lles dá a oportunidade “de introducirse na venda en liña, unha opción que viñamos barallando pero que viamos moi complicada para afrontar desde unha empresa pequena”. “A plataforma abriranos portas para conseguir máis vendas e, se as temos, teremos tamén máis xente traballando, o que axudará a afianzar as familias no rural”, concluíu.
