Inquietude pola madeira queimada na zona demarcada do nematodo

A Asociación Forestal de Galicia pide aclaracións sobre as medidas de prevención da praga. As comunidades de montes veciñais demandan un plan de rexeneración das zonas afectadas polos lumes

Inquietude pola madeira queimada na zona demarcada do nematodo

Reunión da Asociación Forestal de Galicia con comunidades de montes socias do sur de Pontevedra.

A praga do nematodo do piñeiro, con dous positivos no sur de Galicia (Salvaterra e As Neves) nos últimos anos, obriga a manter estrictas medidas de prevención, de cara a evitar a expansión do problema. Os incendios do pasado outono, que afectaron de cheo á zona demarcada polo nematodo -20 quilómetros arredor do primeiro positivo-, aumentan os riscos da praga. Desde a Asociación Forestal de Galicia demandan unha aclaración do Plan de Continxencia que vai aplicar Medio Rural.

Na zona demarcada polo nematodo, continúa moita madeira queimada no monte, pero desde o 1 de abril ata outubro está restrinxida a saída de árbores da zona demarcada, a non ser que vaian sen casca e en camións toldados.

As medidas de prevención pactadas con Bruxelas establecen que toda a madeira decaída debe estar retirada do monte antes do 1 de abril

Esta situación, na práctica, obrigaría a aprazar as cortas de madeira comercial queimada ata o outono, pois as industrias do interior da zona demarcada non teñen capacidade para a absorción da madeira orientada a trituración.

A cuestión é que, de acordo coas medidas de prevención pactadas coa Comisión Europea, todas as árbores decaídas da zona demarcada deberían estar retiradas do monte antes do 1 de abril. Vai a Xunta proceder á corta de toda a madeira queimada durante a primavera-verán, por medio da contrata que mantén con Tragsa? Aplicaranse medidas excepcionais para permitir a retirada da madeira polas comunidades no menor prazo posible? Atrasaranse as cortas desa madeira ata outubro?

Son todas cuestións que están sen despexar e para as que non teñen resposta nin as comunidades de montes afectadas nin a Asociación Forestal de Galicia (AFG), que está mantendo reunións de traballo cos seus montes veciñais socios.

A última reunión da AFG con comunidades socias desenvolveuse na tarde do xoves no Porriño, con presenza de comunidades de montes de Vigo, O Porriño, Mos e Salceda de Caselas.

Plan público de rexeneración do monte
As comunidades de montes trasladáronlle tamén á Asociación Forestal o seu interese en impulsar a rexeneración das zonas afectadas polos lumes, pero 200 días despois dos incendios, continúan á espera dun plan público que posibilite tanto as reforestacións como a creación de franxas de protección en torno ós núcleos de poboación.

Estes días, Medio Rural convocou unha liña de axudas para primeira forestación de terras con frondosas e piñeiros, pero desde a óptica da AFG, trátase dunha oportunidade perdida para apoiar ás comunidades de montes afectadas polos lumes, pois a convocatoria establece que as terras a forestar deberon estar desarboradas os últimos 10 anos, co cal quedan fóra da convocatoria a maioría das áreas queimadas.

Axudas para retirada de madeira non comercial
Outro dos problemas que preocupa nas comunidades é a ausencia de xestión da madeira queimada sen valor comercial. A Xunta convocou o pasado outono axudas para propiciar a súa corta e trituración, co compromiso de resolver estas axudas antes do 31 de xaneiro. Sen embargo, continúan sen resolverse na actualidade, o que paraliza a rexeneración dos montes queimados e representa xa un problema fitosanitario.

O director xeral de Ordenación e Produción Forestal, Tomás Fernández Couto, asegurou onte no Parlamento, a preguntas do Bng, que todos os expedientes das axudas estaban “analizados” e que a previsión é que “poidan estar realizados o antes posible”.

Fernández Couto tamén apuntou que a Xunta está a colaborar coas comunidades na trituración da madeira non comercial para a que non se pediran axudas. “Están todos os traballos feitos, en execución ou previstos”, sostivo.

Valoración de novas fórmulas para a saca da madeira queimada en montes con convenio

Os retrasos que houbo este inverno na saca da madeira queimada dos montes con convenio coa Xunta obrigan á busca de novas fórmulas para a súa xestión. O director xeral de Ordenación e Produción Forestal, Tomás Fernández Couto, avanzou no Parlamento que se están valorando novos procedementos para axilizar as vendas nun futuro, tal e como pedía o sector. “Serán precisos cambios normativos, pois os procedementos están regulados pola Ley de Contratos del Estado”, asegurou.

Desde o Bng acusouse a Medio Rural de “deixadez” na saca da madeira comercial queimada dos montes con convenio, un aspecto que negou Fernández Couto. “Non foi deixadez. Foron os prazos normativos”, defendeu.

Deixa unha resposta

O teu enderezo electrónico non se publicará Os campos obrigatorios están marcados con *

Solicitamos o seu permiso para obter datos estadísticos da súa navegación nesta esta web, en cumprimiento do Real Decreto-ley 13/2012. Si continúa navegando consideramos que acepta o uso das cookies. OK | Máis información