Inleit, a industria láctea que se asentou en Teixeiro para elaborar produtos lácteos de alto valor engadido, está a provocar unha sorpresa maiúscula no agro. A empresa trasladoulle a máis de medio cento de granxas unha proposta de contrato a prezos irrisorios, no entorno dos 23-25 céntimos. A oferta marca un pago variable para as granxas en función da cotización europea da manteiga e do leite en po, produtos ambos que sufriron un desplome de prezos nas últimas semanas.
A proposta de contrato de Inleit, que se espallou no campo como un regueiro de pólvora nos últimos días, deixou estupefacto ó sector, pois a industria sitúase na actualidade no treito alto de prezos pagados no campo, no entorno dos 32 céntimos / Kg., e captou a multitude de granxas durante este último inverno con boas ofertas.
O novo contrato fíxollo chegar Inleit a máis de medio cento de granxas ás que lles toca renovar o seu contrato en xuño. Son granxas que na súa maioría herdara a industria dunha ruta de recollida que deixou Iparlat en Lugo o pasado ano, e que comezaran a traballar con Inleit meses antes da apertura da súa planta de Teixeiro.
Granxas afectadas e organizacións agrarias dan por feito que ese non será o contrato definitivo, pero a súa presentación xerou malestar e preocupación no sector
En vista da oferta actual da industria, Unións Agrarias púxose en contacto coa empresa para abordar a situación. “Temos o compromiso de que esa oferta se vai retirar e de que se lle vai presentar ás granxas outra oferta acorde á realidade do sector” -expuxo hoxe o secretario xeral de Unións Agrarias, Roberto García, en rolda de prensa-. “O contrato real será outro”, conclúe García.
Desde granxas proveedoras de Inleit confirman tamén que a empresa lles comunicou que esa oferta non era a real e que a súa presentación viña motivada pola dificultade de concretar unha proposta con dous meses de antelación, tal e como esixe a lei, en plena crise do coronavirus.
Inleit centra a parte principal da súa actividade na obtención de proteínas lácteas en po orientadas á industria alimentaria (produtos dietéticos, preparados deportivos, alimentación infantil, etc.). É unha gama de produtos lácteos de alto valor engadido, polo que no sector chama a atención que presentara unha oferta na que o 100% do leite se lle pagaría ás granxas ó prezo de produtos estándar, como o leite en po desnatado e a manteiga.
Así as cousas, no agro interprétase a proposta de contrato de Inleit como un globo sonda. Trátase dun contrato que, segundo asegura Unións, non se levará á práctica, pero que xerou un pequeño terremoto nos últimos días, pois introduce un precedente que pode ser tomado como referencia por outras industrias nun futuro.
Na actualidade, só hai dúas industrias que pagan parte do leite vinculado ó prezo dos produtos lácteos industriais, con contratos que rondan a fórmula 80 – 20 (80% do leite a prezo fixo e 20% a prezo variable, ligado á cotización dos produtos lácteos industriais). É a fórmula que emprega por exemplo Larsa (Capsa), se ben a industria asturiana fixou un solo de 29 céntimos / Kg. para ese 20% variable, o que representa unha garantía para as granxas.
A outra industria que traballa con este tipo de fórmulas, Reny Picot, non ten fixado en cambio ningún límite por abaixo, o que na actual coxuntura supón un problema para as granxas. En Unións avanzan que abordarán con Reny Picot esa situación, precisando tamén que a industria mantén na actualidade un importante número de contratos co 100% do leite a prezo fixo.
Máis información
– Inleit trasládalle ás granxas unha oferta de contrato negociable.