Galego
A empresa InLeit Ingredients, con sede en Curtis, construirá e porá en marcha ao longo de 2021 un novo proxecto dentro das súas instalacións. Neste caso, trátase dunha planta piloto destinada ao desenvolvemento e obtención de novos ingredientes lácteos de alto valor engadido. Para conseguir este obxectivo, equiparase con sistemas de última xeración destinados ao fraccionamiento do leite, modificación de retentados e permeados, e funcionalización de proteínas.
Con esta nova infraestrutura, á que se destinarán máis de 4 millóns de euros, búscase resolver as limitacións que presentan as técnicas empregadas actualmente para mellorar a separación do leite. Asímesmo, grazas a técnicas de vangarda prevese poder avanzar en novas solucións que permitan a obtención de coproductos de proteína de maior calidade, tal e como está a demandar o mercado, converténdose así nunha das poucas plantas a nivel nacional e europeo que traballen neste tipo de proceso.
Outra das novidades é que esta nova planta poderá ser utilizada por empresas da comunidade, de forma que poidan desenvolver os seus propios produtos e xerar coñecemento técnico e industrial para elas mesmas e o resto do sector, algo polo que diversas compañías xa mostraron interese. Deste xeito, ofrécese a posibilidade de que outras empresas galegas e nacionais poidan beneficiarse do uso dunha planta piloto única en España para o desenvolvemento de proxectos I+D+i relacionados coas proteínas lácteas e que habitualmente deben ser subcontratados a empresas estranxeiras para a súa realización.
Neste sentido, será un bo soporte para que se poidan probar potenciais aplicacións de produtos en campos como os lácteos frescos, nutrición deportiva e infantil, ou queixos, entre outros.
O proxecto servirá ademais para a captación de novos mercados tanto nacionais como internacionais, aproveitando as tendencias á alza no ámbito das proteínas de alto valor engadido e altos valores nutricionais.
